Телото на 13-годишната Лиза Т. од берлинскиот округ Марцан, по која се трагаше со денови, беше пронајдено во Бранденбург. Тешко повреден маж, осомничен за нејзиното киднапирање и убиство, беше уапсен на местото каде што беше пронајдена, пишува германскиот портал ZDFheute. Берлинската државна обвинителка потврди дека пронајденото тело му припаѓа на исчезнатото девојче.
Тоа беше откриено во напуштена куќа во Бад Фрајенвалде, на околу педесет километри од нејзиниот дом. Полицијата уапси тешко повреден маж на истата локација, чиј идентитет сè уште не е официјално утврден. Обвинителите се сомневаат дека тој го киднапирал и убил девојчето, кое исчезна минатиот вторник. Мажот си нанел повреди опасни по живот и моментално е во болница во критична состојба. Според информациите од агенцијата ДПА, тој бил повреден со огнено оружје.
Полицијата претходно добила дојава дека неовластено лице се наоѓа во напуштената зграда. Весникот „Билд“ пишува дека сопственикот на празната куќа дошол на закажан состанок за да ја разгледа и го пронашол телото на девојчето и повредениот маж во куќата. Точната причина за смртта сè уште не е позната и ќе се утврди со обдукција.
Полицијата веднаш се посомневала во сериозно кривично дело
Портпаролот на канцеларијата на берлинското обвинителство, Михаел Пецолд, изјави за агенцијата ДПА дека очекува судско-медицинскиот преглед да биде извршен денес. Агенцијата ДПА, исто така, известува дека девојчето е мртво подолго време.
Денес, собирањето траги продолжува во куќата и на околното земјиште. Сосед изјави за „Билд“ дека на денот на исчезнувањето на Лиза, автомобил со берлински регистарски таблички бил паркиран пред куќата со часови со вклучени сите четири трепкачи.
Лиза исчезна минатиот вторник наутро, околу 7:20 часот, кога го напуштила својот дом на Барнимплац за да оди на училиште, каде што никогаш не пристигнала. Од самиот почеток, истражителите се посомневале во сериозно кривично дело, како што се убиство или сериозни сексуални престапи, и верувале дека таа не заминала доброволно.
Кучиња за трагање, хеликоптер и подводен дрон го бараа девојчето
Пред три дена беше започната обемна потрага во која учествуваа стотици полицајци. Полицајците разговарале со жителите, делеле летоци и ја пребарувале пошироката област. Во потрагата биле вклучени и кучиња-трагачи, хеликоптер и подводен дрон.
Отворена е посебна телефонска линија за пријавување од граѓаните. Пребарувањето било фокусирано на округот Марцан-Хелерсдорф, каде што живеело девојчето, а полицијата ги пребарувала блиските паркови, областа околу големиот трговски центар и рутата по која патувала.
© Vecer.mk, правата за текстот се на редакцијата
