Американскиот претседател Доналд Трамп потпиша препорака со која се бара намалување на препорачаните детски вакцини од 18 на 11, како и раздвојување на комбинираната МРП-вакцина (морбили, заушки и рубеола) во три посебни дози, пишува Би-Би-Си.
Трамп изјави дека сака да се намали бројот на „боцкања“ и сугерираше дека комбинираната вакцина може да биде опасна, повторувајќи ги сомнежите за поврзаност меѓу вакцините и аутизмот.
Наредбата има карактер на препорака, бидејќи задолжителниот календар за вакцинација за посета на училиште го одредуваат сојузните држави, а не федералната власт. Покрај ова, одлуката предвидува и барање за замена на алуминиумските соли што се користат во одредени вакцини за засилување на имунолошкиот одговор.
Здравствените експерти и медицинските организации веднаш ја осудија оваа одлука, оценувајќи ја како опасна и ненаучна:
- Американската академија за педијатрија предупреди дека одложувањето или прескокнувањето на вакцините го зголемува ризикот од враќање на изумрени болести и нагласи дека нема научна причина за раздвојување на МРП-вакцината. Исто така, посочија дека малите количества алуминиумски соли се безбедни и се користат со децении.
- Центрите за контрола и превенција на болести (ЦДЦ) потсетија дека МРП-вакцината е многу побезбедна од самите болести и дека не постојат научни докази оти нејзиното раздвојување носи каква било корист.
- Републиканскиот сенатор и лекар Бил Кесиди ја нарече одлуката погрешна, подвлекувајќи дека претседателот ја нема потребната стручност и дека бројни медицински студии, вклучително и големи истражувања, потврдуваат оти вакцините се ефикасни, безбедни и не предизвикуваат аутизам.
Секретарот за здравство Роберт Ф. Кенеди Помладиот изјави дека целта на мерката е да им се даде поголем избор на родителите, а не да се забрани пристапот до вакцините. Сепак, стручњаците предупредуваат дека поголемиот број посети на лекар поради раздвоените дози само го зголемува ризикот децата да пропуштат важна заштита.
© Vecer.mk, правата за текстот се на редакцијата
