Десетици илјади луѓе маршираа низ улиците на Мадрид во знак на протест против кризата со домувањето во Шпанија откако 87-годишна жена беше избркана од станот во кој живеела со децении.
На Марикармен Абаскал ѝ беа дадени само 30 минути да излезе и да ги земе само најосновните работи, пред да биде придружувана од службеници за социјални услуги и принудена да излезе од зградата на носилка. Г-ѓа Абаскал, која користи инвалидска количка, беше однесена со амбулантно возило додека поддржувачите скандираа „Убијци!“ и „Марикармен, не сте сами!“.
Станот во луксузниот кварт Ретиро во Мадрид беше преземен од инвестициски фонд кој сакаше драстично да ја зголеми киријата.
- Живеам тука 71 година и не сакам да си одам - им рече г-ѓа Марикармен на новинарите во среда, пред да се исели.
Сведоци ја видоа полицијата како ги турка и влече демонстрантите, кревајќи некои за рацете и нозете додека го расчистуваа преминот.
Нејзиното протерување предизвика напнати сцени пред зградата, каде што полицијата употреби сила за да ги отстрани демонстрантите што го блокираа влезот.
- Не успеав да го одбранам мојот дом, но се борев за другите да научат да се борат за она што е нивно - рече г-ѓа Абаскал во видео споделено од синдикатот на станари во петокот. Видеото е снимено од нејзиниот болнички кревет откако се исели.
- Ве молам, борете се - апелираше таа до демонстрантите кои бараа мерки за заштита на станарите, правила против измами и забрана за иселување без обезбедување алтернативен сместувачки капацитет.
До саботата навечер, толпи од десетици иљади луѓе маршираа низ градот носејќи транспаренти, скандирајќи и палејќи факели, додека некои поставија шатори на популарниот јавен плоштад Пуерта дел Сол во мирен протест.
Таткото на г-ѓа Абаскал првпат го изнајмил станот во 1956 година, а таа продолжила да живее во него како закупец по смртта на нејзините родители, во време кога имаше ограничување на киријата, објавија шпанските медиуми.
Зградата го смени сопственикот во 2018 година и на г-ѓа Абаскал ѝ беше понудена опција да ја купи, но таа не можеше да си ја дозволи, според Синдикатот на закупци во Мадрид, кој го организираше протестот во саботата..
- Целата оваа ситуација со домувањето е срцепарателна - рече учесникот на протестот Симон де ла Рива (43), наставник по професија.
- Неприфатливо е фондовите на мршојадци да купуваат куќи, луѓето да не можат да си дозволат да живеат, цели семејства да бидат исфрлени на улица и една постара жена да биде избркана. Г-ѓа Абаскал стана симбол на кризата со домувањето во Шпанија.
Случајот укажува на зголемен притисок врз долгорочните станари во големите градови во Шпанија, каде што вртоглаво растечките кирии, гентрификацијата и недостатокот на прифатливи станови ги поттикнаа социјалните и политичките тензии.
Туризмот и растот на населението поттикнати од имиграцијата дополнително го оптоварија ограниченото снабдување со станови во градовите, велат аналитичарите.
© Vecer.mk, правата за текстот се на редакцијата
