Папамобил, претходница, протоколи за итна медицинска помош... Секое папско патување бара темелни подготовки – балансирање меѓу дипломатијата, политиката, верата и безбедноста, известува „Франс-прес“ (Agence France-Presse). Папата Лав XIV ќе престојува во Франција од 25 до 28 септември, под будното око на 15.000 припадници на безбедносните служби.
За време на неговата четиридневна посета, папата ќе се сретне со жртви на злоупотреба и ќе им се обрати на француските и европските лидери, како и на УНЕСКО. „Посетата на папата Лав на Франција предизвика вистински бран од интерес“, изјави за „Ројтерс“ пензионираниот француски бискуп Марк Стенгер. Околу 600.000 луѓе се пријавиле за присуство на мисата на отворено во близина на Елисејските Полиња.
Покрај Париз, Лав ќе го посети и маријанското светилиште во Лурд, како и Мец – град на германската граница и родно место на Робер Шуман, еден од основачите на Европската Унија.
Првиот американски папа таму ќе одржи говор на тема „Европските корени за мир и единство“, пренесува „Ројтерс“, додавајќи дека францускиот претседател Емануел Макрон ги поканил лидерите од сите земји членки на ЕУ на настанот.
Иако подготовките вклучуваат постојана комуникација меѓу Ватикан и Елисејската палата, планирањето на првата посета на папата на Париз по 2008 година започнало зад сцената многу пред официјалната објава.
По добивањето официјална покана, изборот на дестинацијата на папата се разгледува „од случај до случај“, врз основа на „низа критериуми – како пасторални, така и политички“ – што претставува сложен процес тесно поврзан со меѓународниот контекст, објасни извор од Ватикан за „Франс-прес“.
© Vecer.mk, правата за текстот се на редакцијата
