Соединетите Американски Држави ѝ се заканија на Украина со прекин на размената на разузнавачки информации доколку нејзината армија продолжи со нападите врз руските рафинерии, објави американскиот портал „Аксиос“.
„Аксиос“ цитираше украински функционер запознаен со разговорите во Мајами. Претседателот Доналд Трамп претходно најмалку шест пати го замолил Володимир Зеленски да ги запре нападите врз руските нафтени постројки, поради нивното влијание врз цените на горивата во Америка.
Според украинскиот функционер, заканата ја упатиле пратениците на Трамп, Стив Виткоф и Џаред Кушнер, за време на осумчасовните разговори на 9 октомври. Американски функционер, исто така цитиран од „Аксиос“, негираше дека на Киев му се заканува со сокривање на разузнавачки информации, но потврди дека Вашингтон бара прекин на нападите врз руските рафинерии.
Трамп побара прекин на нападот, Зеленски постави услов
Зеленски им понуди на американскиот претседател и неговите пратеници да ги запрат нападите врз руските рафинерии, но под услов Москва истовремено да престане да ги таргетира украинските електрани и другата енергетска инфраструктура.
Трамп, според американскиот функционер, не прифатил таков предлог. Тој побара од Киев еднострано да ги прекине нападите, имајќи предвид дека украинските напади врз руските рафинерии не се исти како руските напади врз украинската електроенергетска мрежа.
Американската администрација смета дека украинските напади, покрај штетата што ја предизвикуваат на руската нафтена индустрија, дополнително го намалуваат снабдувањето со гориво на светскиот пазар и придонесуваат за зголемување на цените во САД.
Американски функционер предупреди дека Зеленски, со продолжување на тие операции, го загрозува односот со Трамп, кој го градеше во последните шест месеци.
Вашингтон се согласи со Москва
За време на разговорите во Мајами, Виткоф и Кушнер ја информираа украинската делегација дека Трамп има намера да разговара со Владимир Путин и да ги ублажи санкциите за извозот на руски дизел.
Американскиот претседател потоа објави дека постигнал договор со Путин за испорака на неколку милиони тони руско гориво на американскиот и светскиот пазар, што предизвика остра реакција од Зеленски.
Вашингтон смета на зголемување на испораките на руски дизел за да го ублажи зголемувањето на цените на горивата, но и дека новите енергетски договори ќе ја охрабрат Москва да направи отстапки во преговорите за завршување на војната.
За време на разговорите во Мајами, американските претставници разговараа за безбедносните гаранции за Украина, територијалните прашања, реконструкцијата на земјата и нејзините идни односи со НАТО и Европската Унија.
Виткоф и Кушнер ја разгледуваат можноста да одат во Москва и Киев следната недела, но продолжувањето на нивните дипломатски активности е неизвесно по спорот со украинската делегација. За време на последниот телефонски разговор со Трамп, Путин не се согласил за итно продолжување на мировните преговори, објави неговиот советник Јуриј Ушаков.
© Vecer.mk, правата за текстот се на редакцијата
