Принцот Вилијам и принцезата Кејт се огласија по повод случајот со Џефри Епстајн, изразувајќи длабока загриженост за неговите жртви. Станува збор за најновиот потег на британската монархија со кој се обидува да се дистанцира од скандалот поврзан со поранешниот принц Ендру и неговите врски со осудениот сексуален престапник, пишува AP.
Најпопуларните членови на британското кралско семејство порачаа дека се загрижени поради содржината на повеќе од три милиони страници документи кои Министерството за правда на САД ги објави порано овој месец. „Можеме да потврдиме дека принцот и принцезата од Велс се длабоко загрижени поради постојаните откритија“, стои во соопштението од палатата. „Нашите мисли се со жртвите.“
Последици за принцот Ендру
Изјавата е објавена пред тридневната посета на Вилијам на Саудиска Арабија, која започнува денес, и е дел од одговорот на монархијата на сè поголемата криза околу поранешниот принц. На Ендру, 65-годишниот брат на кралот Чарлс III, му беа одземени кралските титули уште во октомври поради претходните откритија за неговата врска со Епстајн. Сега е познат само како Ендру Мaунтбетен-Виндзор.
Кралот минатата недела го натера Маунтбетен-Виндзор да го напушти неговиот долгогодишен дом во Royal Lodge близу замокот Виндзор. Со тоа се забрза преселувањето кое беше најавено во октомври, но не се очекуваше да се спроведе до крајот на годината.
Маунтбетен-Виндзор сега престојува на кралскиот имот Sandringham во источна Англија. Привремено ќе живее во куќата Wood Farm Cottage додека не се уреди неговиот постојан дом на имотот.
© Vecer.mk, правата за текстот се на редакцијата
