Граѓаните на Австралија од денеска за првпат на пописот на населението ќе можат да се изјаснат за својата сексуална ориентација и род, односно да пријават дали се идентификуваат со друг пол од оној при раѓањето.
Пописот од 66 прашања денеска се спроведува низ целата земја, а тоа е првиот што се одржува под владата на Лабуристичката партија од левиот центар.
Актуелната лабуристичка влада ја промени својата одлука и повторно ги вклучи тие прашања, откако пред две години привремено ги отстрани, со образложение дека се „поларизирачки“.
Прашањата се наменети за членовите на домаќинствата постари од 16 години. Опциите за одговор за сексуалната ориентација се: хетеросексуална, геј или лезбејска, бисексуална, „не знам“, „не сакам да одговорам“, или термин по избор на испитаникот кој може да се впише во предвиденото празно поле.
Опциите за родот со кој испитаникот моментално се идентификува, а кој се разликува од оној запишан при раѓањето, се: маж, жена, небинарна особа, „не сакам да одговорам“ или друг термин што испитаникот може да го наведе. Прашањата за полот и сексуалната ориентација се опционални, исто како и прашањето за вероисповед, кое е вклучено уште од првиот попис во 1911 година.
Лабуристите за време на кампањата за изборите во 2022 година, на кои дојдоа на власт по девет години минати во опозиција, ветија дека прашањата за сексуалноста и родот ќе бидат вклучени во следниот попис на населението. Владата на Австралија ги одредува темите за секој попис, додека Заводот за статистика (АБС) одлучува за формулацијата на прашањата.
Владата во 2024 година одлучи да не отстапува од прашањата од пописот во 2021 година, заради зачувување на општествената кохезија.
Заменикот премиер Ричард Марлс тогаш изјави дека „не сакаме да покренуваме дебати што би предизвикале поделби во заедницата“.
Владата набрзо попушти, по речиси една недела остри реакции од ЛГБТК+ активистите и критики од одделни пратеници на Лабуристичката партија.
Премиерот Ентони Албанезе потврди дека прашањето за сексуалната ориентација ќе биде вклучено во следниот попис на населението.
Главниот статистичар на АБС, Дејвид Груен, изјави дека неговата служба за време на јавните консултации пред пописот утврдила „значително ниво на интерес за поставување прашања за родот и сексуалната ориентација“.
„За дел од населението, прибирањето на овие податоци е многу важно. Но за други луѓе, тоа се информации што едноставно не сакаат да ги споделат“, изјави Груен за австралискиот јавен сервис АБЦ. АБС очекува дека 85 отсто од одговорите ќе бидат доставени преку интернет, што е пораст во однос на речиси 80 отсто од 2021 година, кога речиси половина од населението беше во карантин поради пандемијата, а Заводот исто така обезбедува и хартиени обрасци за попис на барање.
Теренскиот персонал им помага на бездомниците и на лицата кои живеат во оддалечените подрачја да учествуваат во пописот, додека непостапувањето по налог за учество во пописот може да резултира со парична казна до 364 австралиски долари дневно.
АБС соопшти дека до утрово се поднесени повеќе од пет милиони обрасци, а се очекува да бидат речиси 11 милиони.
© Vecer.mk, правата за текстот се на редакцијата
