Ормушкиот Проток ќе остане затворен сè додека Соединетите Американски Држави не ги исполнат сите услови од привремениот договор потпишан со Иран во јуни, изјави главниот ирански преговарач Мохамад Бакер Калибаф, во обраќањето пренесено од државните медиуми.
Калибаф пред иранскиот парламент прецизираше дека барањата на Техеран опфаќаат целосно укинување на американската блокада врз иранските пристаништа, укинување на сите санкции поврзани со извозот на иранска нафта, одблокирање на замрзнатите финансиски средства, како и итен прекин на сите воени закани и операции на сите фронтови.
Меморандумот за разбирање, кој беше потпишан на 17 јуни, брзо пропадна поради длабокиот спор околу контролата врз Ормушкиот Проток, поморски премин низ кој пред избувнувањето на судирите минуваше приближно една петтина од вкупната светска нафта и течен природен гас.
Американскиот претседател Доналд Трамп уште на 7 јули изјави дека договорот е „мртов“, по што иранското Министерство за надворешни работи една недела подоцна официјално го прогласи за суспендиран.
Со меморандумот беше предвиден рок од 60 дена, со можност за продолжување доколку се согласат двете страни, во кој Вашингтон и Техеран требаше да постигнат сеопфатен договор што ќе ги опфати и останатите отворени прашања, вклучително и судбината на иранската нуклеарна програма.
Висок ирански функционер за „Ројтерс“ изјави дека Иран ќе премине во „целосна офанзива“ поради целосниот застој во дипломатските напори за прекин на долготрајниот конфликт.
© Vecer.mk, правата за текстот се на редакцијата
