Во догледна иднина, Италија нема да ги прифати мигрантите што Германија сака да ги врати кај неа, и покрај новите правила на Европската Унија, изјави потпретседателот на италијанската влада, Матео Салвини.
Салвини ја објасни својата одлука со постапките на германските невладини организации кои спасуваат мигранти на бродови во Медитеранот и ги носат во Италија, од каде што некои потоа одат во Германија.
Рим и Берлин не се согласуваат за третманот на секундарните мигранти, односно оние кои, по влегувањето во ЕУ во една земја-членка, го продолжуваат своето патување кон друга.
Салвини: Италија нема да прифаќа мигранти вратени од Германија
„Германија нема право да ни врати ниту еден нелегален мигрант сè додека бродовите на германските невладини организации пловат низ Медитеранот за да истоварат илјадници нелегални мигранти во Италија и Европа“, рече Салвини.
Салвини претходно зазеде особено тврд став кон мигрантите кои пристигнуваат по море и организациите кои им пружаат помош, за време на неговиот претходен мандат како министер за внатрешни работи.
Новиот пакт на Европската Унија за азил и миграција е во сила од средината на јуни. Врз основа на овие нови правила, Германија и другите земји сакаат да ги вратат во Италија мигрантите кои влегле во ЕУ преку италијанскиот брег.
Од стапувањето во сила на новиот пакт, Италија не прифатила ниту еден мигрант вратен од Германија. Според официјалните податоци, од 2023 година Италија одбила околу 80.000 барања од други земји за враќање мигранти. Причината е целосно преоптоварување на националниот систем за прифаќање.
© Vecer.mk, правата за текстот се на редакцијата
