Европската комисија ќе предложи нови мерки за заштита на Европската Унија од нелојална конкуренција и дампинг-увоз. Соопштението го даде во Европскиот парламент претседателката на Комисијата, Урсула фон дер Лајен, пренесува Ројтерс.
Централниот дел од предлогот е механизам што ќе им овозможи на членките на ЕУ брзо да го ограничат пристапот до единствениот пазар во случај на ненадеен прилив на евтини стоки што ја загрозуваат европската индустрија. „Конкурентноста зависи од тоа нашите компании да можат да се натпреваруваат под фер услови на глобално ниво“, рече Фон дер Лајен.
Комисијата исто така ќе предложи пакет за солидарност за земјите што се соочуваат со специфични трговски закани. „Во свет каде што економската моќ сè повеќе се користи како оружје, Европа мора да ја искористи својата економска моќ за заеднички да ги брани своите интереси“, заклучи претседателката на Комисијата.
© Vecer.mk, правата за текстот се на редакцијата
