Легендата на Рома и поранешен италијански репрезентативец, Франческо Тоти, смета дека современиот фудбал значително се разликува од оној во кој тој ја градеше својата кариера. Според него, денешната игра е повеќе насочена кон бизнисот, физичката подготвеност и брзината, додека индивидуалниот талент и креативноста се помалку застапени.
„Во фудбалот што го познавав како навивач и играч имаше повеќе љубов кон клупскиот дрес, посветеност и чувство на припадност. Денес тоа е бизнис. Фудбалот стана помалку технички, а повеќе физички“, изјави Тоти.
Поранешниот капитен на Рома додава дека денес е тешко да се најде фудбалер кој воодушевува со своите технички квалитети. Според него, играчите располагаат со сила, брзина и моќ, но има помалку талент и креативност во споредба со претходните генерации.
Тоти целата своја професионална кариера ја мина во Рома, за која настапуваше 25 години. Токму неговата лојалност кон клубот од родниот град е еден од примерите за посветеноста и поврзаноста со клупскиот дрес.
