Младата ѕвезда на австралиската репрезентација, Кристијан Волпато, кој пред само неколку недели беше дел од Светското првенство, се најде во центарот на голем скандал во Сиднеј. Имено, тој наводно бил позитивен на кокаин за време на рутинска контрола од страна на сообраќајната полиција, јавуваат локалните медиуми.
Според извештаите, 22-годишниот фудбалер бил запрен во неговото купе БМВ околу еден час по полноќ на познатиот мост Анзак. Причината за запирањето била пребрзо возење – Волпато „летал“ со 109 километри на час во зона каде што ограничувањето е само 60 км/ч.
Откако бил запрен, фудбалерот бил подложен на тест за дрога, а прелиминарните резултати покажале присуство на кокаин. Полицијата реагирала веднаш: Волпато бил казнет за пребрзо возење, а неговата меѓународна возачка дозвола била одземена на шест месеци, што значи дека му е забрането да вози на територијата на Нов Јужен Велс. Исто така, бил земен и секундарен примерок од течност и испратен на детална лабораториска анализа за да се потврдат наодите.
