Фудбалската репрезентација на Турција доби нов селектор. Турската фудбалска федерација го именуваше Серген Јалчин за наследник на Италијанецот Винченцо Монтела, а со 53-годишниот стратег и неговиот стручен штаб ќе биде потпишан четиригодишен договор.
Монтела ја напушти селекторската функција по серијата лоши резултати, меѓу кои и четирите последователни порази на почетокот од Лигата на нации. Турција претходно не успеа да ја мине ниту групната фаза на Светското првенство во 2026 година.
Јалчин е добро познато име во турскиот фудбал. Како играч настапуваше за Бешикташ, Фенербахче и Галатасарај, а за националниот тим забележа 37 настапи во периодот од 1994 до 2003 година. Беше дел од турската репрезентација на Европските првенства во 1996 и 2000 година. Најголемиот тренерски успех го оствари со Бешикташ, со кој во сезоната 2020/21 ја освои двојната круна, односно титулата во турското првенство и националниот куп.
Новиот селектор ќе дебитира на 12 ноември, кога Турција ќе ја пречека Белгија во Измир. Три дена подоцна, турската репрезентација ќе гостува кај Франција во Бордо.
