Дали Ива Михајлова од Кочани ја напуштила Македонија нелегално? Ова прашање се отвора по одговорот од Министерството за внатрешни работи, според кој нема евидентиран излез од државата на обвинетата за сообраќајна несреќа со смртни последици. Иако Михајлова за бугарските медиуми тврди дека легално ја преминала границата, податоците од МВР не го потврдуваат тоа, што отвора сомнежи за начинот на кој заминала во Бугарија.
-Во однос на лицето за кое прашувате, Ве известуваме дека се извршени проверки во системот за гранична контрола на Министерството за внатрешни работи, при што е утврдено дека за наведеното лице нема евидентиран излез од територијата на Македонија, одговорија од МВР за ,,Фокус”.
Во изјава за Бугарската национална телевизија (БНТ), Михаилова вели дека нема ништо нелегално во нејзиното преминување на македонско-бугарската граница и дека тоа го сторила со своите лични документи. На прашањето како ѝ било дозволено да замине од Македонија, таа вели оти граничната полиција соработувала.
„Ја преминав границата со моите документи. Вчера се чувствував многу лошо. Разговарав со мојот адвокат и се договоривме – заедно одлучивме тој да дојде по мене и јас да се вратам во Бугарија. Ги предадов документите на проверка и нè пуштија. Поминавме низ контрола. Немаше ништо незаконско во моето преминување. Следно, треба да бидам примена во болницата ‘Пирогов’ на лекување, по што ќе следи рехабилитација“, изјави Михаилова за БНТ.
© Vecer.mk, правата за текстот се на редакцијата
