Премиерот Христијан Мицкоски најави дека уште денеска ќе побара од министерот за култура и туризам разрешување на директорот и на Управниот одбор на институцијата надлежна за споменикот „Македониум“ во Крушево. Поводот за оваа одлука е скандалот што ја бранува јавноста, откако просторот на овој значаен споменичен комплекс бил изнајмен за снимање музички спот на рапер од Косово.
„Навистина тоа коешто таму се случило е нешто коешто не требало да се случи. Ќе побарам од министерот за култура и туризам да биде разрешен директорот на таа институција, заедно со Управниот одбор, бидејќи таков тип на институции не треба да бидат изнајмувани и користени за такви намени“, истакна Мицкоски.
Премиерот им се извини на граѓаните за направениот пропуст и увери дека ќе се преземат сите мерки за вакви инциденти да не се повторат во иднина.
© Vecer.mk, правата за текстот се на редакцијата
