Со порастот на вандализмот изминатава година кој сè повеќе зема замав на спортските и детските игралишта, кај урбаната опрема и јавната инфраструктура низ скопските општини, Град Скопје излезе со најконкретен план и мерки за превенција и санкционирање на несовесното однесување.
Додека дел од општините како Бутел, Аеродром и Карпош најавуваат или започнуваат со сопствени иницијативи, од поставување камери до користење дронови, Градот Скопје веќе ја заокружува постапката за воведување сеопфатен систем за видеонадзор на јавните површини.
Контролен центар и прва фаза на 30 критични локации
Советот на Град Скопје донесе Одлука за начинот на вршење видеонадзор, со која Градот ќе биде контролор и одговорен за заштитата на личните податоци. Во рамките на проектот е предвидено и формирање посебен Контролен центар во просториите на Град Скопје, каде што во три смени ќе работат пет лица.
Во првата фаза планирано е поставување камери на 30 критични локации, утврдени преку детални анализи, со акцент на јавни површини каде што најчесто се создаваат диви депонии, како и во парковите со цел зачувување на урбаната опрема. Од Градот потенцираат дека системот ќе работи непрекинато, следен од стручно обучени лица, при што се воведени строги правила и забрани за користење лични уреди со камера за време на смената, со цел целосна заштита на податоците.
За секој увид во видеозаписите ќе биде потребно поднесување писмено барање преку градската Архива со јасно наведен законски основ, за што е неопходно писмено одобрение од градоначалникот. Согласно одлуката, снимките ќе се чуваат најдолго до 30 дена.
Завршна фаза и интеграција со општините
Од Град Скопје информираат дека постапката е во завршна фаза. Наскоро се очекува распишување на јавна набавка преку која ќе се набават самите камери и целосниот систем за нивно безбедно следење и софтверска заштита.
Градските власти најавија дека овој систем ларге мапирано ќе ги опфати и општините Бутел и Аеродром, со цел да се постигне целосна координација и соодветно интегрирање на локациите. Според најавите, целиот проект на Град Скопје се очекува да биде целосно имплементиран и функционален до крајот на годината, со што главниот град прв ќе ја заокружи оваа значајна превентивна мерка за заштита на јавниот ред и имот.
© Vecer.mk, правата за текстот се на редакцијата
