Вицепремиерот и министер за транспорт Александар Николоски упати апел до македонските превозници да не наседнуваат на лажни информации и спинови поврзани со наводни нови ограничувања за нивниот престој во Шенген-зоната.
Гостувајќи во емисијата „Вести плус“ на Канал 5, Николоски демантираше дека во Брисел имало некаков вонреден состанок за превозниците од Западен Балкан, посочувајќи дека дезинформациите намерно доаѓаат од соседна држава каде што се во тек избори.
„Пред два дена во Брисел немаше никаков состанок, туку вообичаена прес-конференција. Би ги замолил превозниците да не потпаѓаат под влијание од една соседна држава. Тоа е чиста лажна вест“, истакна Николоски.
Министерот потсети дека клучниот чекор за овој проблем веќе е направен во февруари, кога Европската комисија ја промени својата визна стратегија и официјално ги призна возачите на камиони и автобуси како професионалци. Оваа промена им овозможува да аплицираат за долгорочни визи и да го заобиколат правилото за престој од најмногу 90 дена во рок од шест месеци.
Николоски откри дека македонските возачи веќе можат да извадат вакви долгорочни визи преку Хрватска и Швајцарија, кои потоа важат за слободно движење низ целата Шенген-зона.
„Кога ќе се влезе во Шенген-зоната со долгорочна виза, нема ограничувања во движењето. Ние и понатаму бараме ЕУ дополнително да ги олесни сите правила, но ова е работно решение што веќе може успешно да се користи“, заклучи Николоски.
© Vecer.mk, правата за текстот се на редакцијата
