Станува збор за една од најголемите заплени на дрога во историјата на земјата, а операцијата била спроведена завчера во близина на Бенгкалис, во провинцијата Риау, пренесува „Еуроњуз“. Бенгкалис се наоѓа во источниот дел на индонезискиот остров Суматра, во провинцијата Риау, долж Малајскиот Проток.
Тоа е област свртена кон Малајскиот Полуостров и се наоѓа релативно блиску до Сингапур. Националната агенција за борба против наркотици соопшти дека добила информација за брод што испловил од Саравак, Малезија. Бродот пловел низ Андаманското Море, а властите се сомневале дека превезува дрога наменета за индонезискиот пазар.
Агенцијата, заедно со царинските службеници, го пресретнала бродот „МВ Рејн Мејкер“ (MV Rain Maker) доцна синоќа и утврдила дека тој пловел под лажно име. „При прегледот на бродот, пронајдовме 2,6 тони течен метамфетамин.
Дрогата била складирана во осум буриња за вода и еден резервоар за вода“, изјави Рој Харди Сиахаан, службеник во агенцијата за борба против наркотици.
Кучиња-трагачи на бродот открија и повеќе од 1,5 милиони нелегални цигари. Уапсени се десет члена на екипажот, сите државјани на Мјанмар. Ова е втора голема заплена во која е вклучен брод под танзаниско знаме во овој регион во текот на месецов.
На 8 август, индонезиските власти запленија 1,3 тони кетамин од брод во водите околу островите Риау, во близина на Сингапур. Тогаш беа уапсени осум члена на екипажот: седум државјани на Мјанмар и еден државјанин на Тајван.
Минатата година, властите ја забележаа најголемата заплена на дрога во историјата на Индонезија, откако на еден рибарски брод пронајдоа две тони кристален метамфетамин. И тој брод пловел од Андаманското Море кон островот Батам.
© Vecer.mk, правата за текстот се на редакцијата
