Што мисли Централната разузнавачка агенција (ЦИА) дека најмногу му е потребно на еден човек по повеќе од една година заробеништво? Една таблета вијагра.
Еван Гершковиц, американски новинар кој поминал 16 месеци во руски затвор под обвинение за шпионажа, ја откри необичната содржина на „пакетот за закрепнување“ што му бил даден откако бил ослободен во 2024 година, како дел од размена на затвореници меѓу Вашингтон и Москва.
За време на неговиот лет дома до воздухопловната база Ендрус во Мериленд, САД, му бил даден мал пакет.
„Обично Стејт департментот подготвува пакети за закрепнување, но овој пат ЦИА ги подготви и ставија вијагра во мојот пакет“, вели тој и продолжува:
„Можеби е паметно решение, трауматизирано лице се враќа дома и ја гледа својата сопруга за прв пат по години или којзнае колку долго. Или е тоа нешто што ЦИА го носи со себе на своите мисии во странство? Не успеавме да откриеме што е тоа“, рече тој.
Гершковиц изјави дека ја чувал таблетата како „сувенир“ од неговото ослободување.
Неговата мајка му кажала на Стејт департментот дека би сакал да пие виски на летот дома, па затоа службеник од Канцеларијата на специјалниот претставник на претседателот за прашања поврзани со заложници му подарил шише виски „Хај Вест Кемпфаер“.
Сепак, ЦИА му забранила да го пие, со образложение дека морал да биде трезен за да се сретне со Џозеф Бајден, тогашниот претседател на САД, по слетувањето во земјата.
© Vecer.mk, правата за текстот се на редакцијата
