Октоберфест важи за еден од најпознатите фестивали во светот, а милиони посетители секоја година доаѓаат во Германија, поточно во Минхен, за да уживаат во пивото, музиката и атмосферата на големите пивски шатори. Сепак, зад добрата забава се кријат и строги правила до кои сите гости мора да се придржуваат.
Октоберфест 2026 почнува на 19 септември и трае до 4 октомври, а на просторот Терезиенвизе не е дозволено сè што би им паднало на памет на посетителите, а одделни прекршоци можат да ги чинат и повеќе стотици, па дури и над 1.000 евра!
Од предмети што не смеете да ги внесете, преку однесувањето во шаторите, па сè до алкохолот и електричните тротинети — ова се правилата што секој посетител на Октоберфест 2026 би требало да ги знае.
1. Ножевите остануваат надвор
На целиот простор на фестивалот важи забрана за носење ножеви. Тоа, според АДАЦ, се однесува и на традиционалните таканаречени ловџиски ножеви. Кој ќе се обиде да внесе нож на просторот на Октоберфест, може да добие казна до 1.000 евра.
За време на Октоберфест, соодветните забрани за носење ножеви и други опасни предмети важат и на важните минхенски железнички станици и станици на С-бан.
2. Испивање кригла пиво на екс — не е само забава, туку и ризик
Секако, криглата пиво е составен дел од Октоберфест. Меѓутоа, оној што ќе се обиде да ја испие во еден здив не покажува само претерана смелост, туку го загрозува и сопственото здравје.
Ако биде фатен, може веднаш да биде исфрлен од фестивалот — дури и ако друштвото го бодри за тоа.
3. Качување на маси или огради
Класика: почнува омилената песна и целото друштво во шаторот се качува на клупите. Меѓутоа, строго е забрането качувањето на маса. Причина за тоа, меѓу другото, е безбедноста, но и можноста да се скршат чаши, садови и мебел.
Обезбедувањето тука не прави исклучоци — кој ќе биде фатен, ќе биде исфрлен.
4. Кражба на кригла
Криглите се еден од симболите на Октоберфест, но нивното место е во шаторот, а не во багажот! Кој ќе се обиде да понесе кригла како „сувенир“, не ризикува само исфрлање, туку и пријава во полиција.
Криглите официјално можат да се купат во продавниците за сувенири. Меѓутоа, изнесувањето кригла од шаторот претставува кражба.
5. Злоупотреба на нараквицата за влез
Откако ќе влезете, дали можете засекогаш да останете внатре? Не баш.
Кој ќе му ја проследи својата нараквица за влез на пријател, ги прекршува правилата. Редарите внимателно ги проверуваат нараквиците, а во случај на злоупотреба, и лицето што ја презело нараквицата и нејзиниот првичен сопственик можат да бидат исфрлени.
6. Пушење во шаторот
Во фестивалските шатори на Октоберфест веќе со години важи целосна забрана за пушење, која се однесува и на електронските цигари.
Кој сепак ќе запали цигара, ризикува проблеми со обезбедувањето. Просториите за пушачи се наоѓаат пред шаторите. Оние што не ја почитуваат забраната ќе бидат отстранети од шаторот.
7. Внесување сопствена храна и пијалаци
Според баварската традиција, во пивските градини е дозволено да се внесе сопствена ужина, но не и пијалак. Истото правило важи и за пивските градини на Октоберфест.
Кој во фестивалскиот шатор ќе внесе сопствена храна или пијалак, ги прекршува јасните правила на угостителите. Ако редарите го забележат тоа, гостинот ќе мора да го напушти шаторот.
8. Големите торби и стаклените шишиња се забранети
Кој на Октоберфест доаѓа со ранец или торба, мора да внимава на нивната големина. Дозволени се торби со зафатнина од најмногу три литри, односно со димензии до 20 × 15 × 10 сантиметри.
Поголемиот багаж мора да се остави на местата предвидени за тоа. Стаклените шишиња исто така не се дозволени на просторот на фестивалот.
9. Конзумирањето канабис може да чини и до 1.500 евра
Од делумната легализација на канабисот, важат посебни правила на народните фестивали во Баварија. На целиот простор на Октоберфест е забрането конзумирањето канабис.
Кој не ја почитува забраната, според АДАЦ, може да биде казнет со парична казна до 1.500 евра.
10. Ниту велосипед и електричен тротинет не можат насекаде
Велосипеди, електрични тротинети, скутери, скејтборди и ролери не смеат да се внесуваат на просторот на фестивалот.
Околу Терезиенвизе, исто така, ќе бидат поставени зони во кои ќе биде забрането изнајмување и паркирање електрични тротинети.
Кој по посетата на Октоберфест ќе седне на електричен тротинет, би требало да има предвид дека за нив, во начело, важат истите ограничувања за алкохол како и за моторните возила. Веќе со 0,5 промили, по правило, се заканува казна од 500 евра, два казнени поени и едномесечна забрана за возење.
© Vecer.mk, правата за текстот се на редакцијата
