Даглас Стјуарт Картер (71), кој мина децении на одделот за извршување на смртна казна во американската сојузна држава Јута, ќе биде пуштен на слобода со кауција откако нова ДНК анализа покажа дека неговиот генетски материјал не се совпаѓа со трагите од местото на злосторството, пренесува „Скај њуз“.
Картер беше осуден за бруталното убиство на Ева Олесен во 1985 година во Прово. На местото на злосторството тогаш немаше физички докази, а пресудата се темелеше на изнудено признание и сведочења кои подоцна беа променети.
Минатата година Врховниот суд на Јута нареди ново судење поради намерно недолично постапување на истражителите. Иако судот наведува дека новите докази го слабеат случајот, Картер на слобода ќе мора да носи ГПС-уред за следење додека го чека новото рочиште.
Случајот предизвика поделени реакции – додека неговото семејство ја поздравува одлуката, семејството на жртвата изрази загриженост, барајќи целосно утврдување на вистината и правда за Ева.
© Vecer.mk, правата за текстот се на редакцијата
