Недостигот на вода станува еден од најголемите ризици со кои се соочува европската индустрија, покрај заканите како што се сајбер-нападите и прекините во синџирите на снабдување. Во студија спроведена од Schneider Electric раководители од повеќе од половина од анкетираните индустриски компании предупредија дека недостигот на вода би можел да го загрози нивниот раст во текот на следните пет години.
Индустриските лидери наведуваат дека во текот на изминатите две години недостигот на вода довел до зголемени оперативни трошоци, дополнителен притисок врз инфраструктурата и буџетите за одржување, како и до прекини во синџирите на снабдување.
Доколку утре дојде до сериозен прекин во водоснабдувањето, 44 отсто од компаниите сметаат дека нивното деловно работење би почнало да трпи последици во рок од 24 часа.
Во просек, повеќе од половина од индустриските лидери очекуваат дека квалитетот или достапноста на водата ќе станат значителна пречка за растот на нивните организации во следните пет години – односно до 2031 година – додека еден од седум испитаници наведува дека водата веќе претставува пречка за нивното деловно работење или раст.
Овие наоди доаѓаат во време кога Европа се соочува со најтешката суша во последните неколку децении. Последиците што моментално се чувствуваат во секторите транспорт и логистика, енергетика и земјоделство, јасно покажуваат дека овие притисоци веќе не се само хипотетички сценарија, туку реалност со која индустријата веќе се соочува.
„Исто како што енергетската транзиција ги преобликуваше индустриските стратегии во текот на изминатата деценија, така и поефикасното управување со водните ресурси ќе ја обликува деценијата што претстои. Индустриската интелигенција заснована на вештачка интелигенција им овозможува на компаниите увид без преседан во тоа како се користи водата, каде таа се губи и како повторно се употребува. Предизвикот веќе не е во разбирањето на проблемот, туку во доволно брзото дејствување за да се обезбеди индустриската иднина на Европа“, изјави Гвенаел Иет, извршен потпретседател за индустриска автоматизација во Schneider Electric.
© Vecer.mk, правата за текстот се на редакцијата
