Тројца членови на едно семејство синоќа загинаа, откако автомобилот во кој се возеле паднал во морето во пристаништето во Пиреја, јавуваат грчките медиуми.

Во несреќата животот го загубиле 45-годишен маж и неговите родители, на возраст од 82 и од 72 години. Автомобилот паднал во морето во близина на влезот Е2 од пристаништето, а причините за несреќата сè уште не се познати.
Спасувачките нуркачи прво го извлекле телото на 45-годишниот маж, додека неговите родители останале заробени во автомобилот. Кратко потоа биле извлечени и телата на таткото и на мајката.
Според првичните информации, автомобилот го управувал 82-годишниот татко, кој најверојатно изгубил контрола над возилото поради лошите временски услови. Во Пиреја претходно наврнал обилен дожд.
Во спасувачката акција учествувале крајбрежната стража, специјализирана нуркачка екипа, приватни пловила и брод од пилотската служба.
© Vecer.mk, правата за текстот се на редакцијата