Екстрадицијата на Чен Џи, човекот за кого се верува дека стои зад една од најмоќните мафијашки организации во Азија предизвика вистински земјотрес во глобалната индустрија за интернет-измами, пишува The Economist.
Чен, кој со години важеше за недопирлив советник на долгогодишниот лидер на Камбоџа, Хун Сен, беше испорачан на Кина. Неговото апсење испрати застрашувачка порака до криминалните синдикати: ако ни најмоќниот човек во државата веќе не може да ве заштити, тогаш никој повеќе не е безбеден.
Падот на криминалниот бос доведе до хаос на теренот. Откако шефовите побегнаа и ги оставија ширум отворени вратите од затворените комплекси, десетици илјади луѓе излегоа на улиците. Овие работници, чувани од вооружени стражари зад бодликава жица, со месеци и години биле принудувани да вршат дигитални измами насочени кон жртви ширум светот.
Индустрија тешка 500 милијарди долари
Глобалната мрежа на сајбер-измами годишно им краде над 500 милијарди долари на граѓаните ширум светот, што го прави овој бизнис споредлив со илегалната трговија со дрога.
Во Камбоџа, политиката и сајбер-криминалот со години беа нераскинливо испреплетени. Илегалните интернет-измами во оваа земја генерираат до 19 милијарди долари годишно — што е рамно на дури 40% од нејзиниот бруто-домашен производ (БДП) и ја надминува вредноста на текстилната индустрија како најголема легална гранка.
Притисокот од Вашингтон и историски заплени
Иако камбоџанските власти со години режираа лажни акции против криминалот, последните месеци меѓународниот притисок стана неодржлив.
Американското Министерство за правда неодамна му заплени на Чен Џи околу 15 милијарди долари во криптовалути, што претставува најголема заплина на странски имот во историјата на САД. Во исто време, САД и Обединетото Кралство воведоа строги санкции за политичари, бизнисмени и за озлогласената конгломератска групација Huione Group, сопственик на најголемиот илегален интернет-пазар за перење пари досега.
Се проценува дека само американските граѓани губат над 10 милијарди долари годишно од овие измами, поради што Вашингтон ја формираше специјалната единица Scam Centre Strike Force за борба против овој криминал во Југоисточна Азија.
Страв од киднапирања и префрлање на бизнисот
Борбата против криминалот ги погоди и туристичките дејности. Поради стравот од киднапирања и принудна работа во центрите за измами, бројот на кинески туристи во Камбоџа драстично падна — од 2,4 милиони во 2019 година на само 850.000, поради што владата мораше да го укине визниот режим за Кинезите.
Сепак, експертите предупредуваат дека индустријата не е уништена, туку само се прилагодува. Главните центри за измами веќе се селат во Лаос, Мјанмар, Шри Ланка и Индонезија. Иако Камбоџа затвори десетици казино-комплекси кои служеле како параван за перење пари, политичкиот систем што ги штитеше овие мрежи останува главно недопрен.
© Vecer.mk, правата за текстот се на редакцијата
