Заминувањето во странство со години е дел од секојдневието на многу луѓе од земјите во регионот, особено од Босна и Херцеговина и Србија. Подобрите плати, условите за работа и потрагата по посигурна егзистенција ги поттикнаа многумина да го продолжат животот далеку од местото каде што пораснале.
Меѓу најпопуларните дестинации се издвојува Германија, која за голем број луѓе од Балканот претставува можност за постабилен живот и нов почеток.
Сепак, по години поминати во новата земја, сè почесто се поставува прашањето дали заминувањето навистина го донело она на што иселениците се надевале.
Токму таква дискусија започнал еден Балканец во популарната Фејсбук група „Балканци во Германија“, кога поставил едноставно, но провокативно прашање: Дали вреди да се работи 40 години во Германија за на крајот да се прима пензија од 1.100 евра?
Во коментарите се јавуваат бројни Балканци со различни ставови.
Една корисничка напишала дека, дури и ако пензијата е таква, работата во Германија овозможува во текот на годините да се заштеди нешто, додека во земјите од Балканот, според нејзиното искуство, многумина едвај ги покриваат трошоците и се задолжуваат за да преживеат.
Друг корисник го споредил тоа со работата во матичните земји, каде, како што навел, луѓето работат за околу 400 евра и повторно тешко ги покриваат трошоците.
Една од учесничките во дискусијата ја истакнала можноста што многу иселеници ја користат – во текот на работниот век да инвестираат во куќи или станови во своите матични земји.
„Сите ние, работејќи во Германија, се обезбедивме со куќи и станови на Балканот“, навела таа, додавајќи дека пензионирањето и враќањето во матичната земја може значително да го промени погледот кон висината на пензијата.
Друг коментатор, пак, сметал дека 1.100 евра пензија во Германија се недоволни за удобен живот, но дека ситуацијата е поинаква доколку пензионерот се врати во својата земја.
Во дискусијата се појавила и идејата дел од заработката во текот на работниот век да се вложува во недвижности. Еден од корисниците предложил купување стан со кредит и негово изнајмување, така што киријата би покривала дел или целата рата, а имотот со текот на времето би станал дополнителна сигурност за староста.
Сепак, тој самиот напоменал дека таквата стратегија не е едноставна и дека недвижностите носат трошоци за одржување.
Дискусијата покажува дека прашањето „Дали се исплати да се работи во Германија?“ нема едноставен одговор. За оние кои заминуваат од Балканот, покрај висината на идната пензија, важни се и можноста за штедење, стекнување имот и создавање дополнителен приход за староста.
© Vecer.mk, правата за текстот се на редакцијата
