Силен поларен бран го погоди Нов Зеланд, донесувајќи обилни врнежи од снег во низинските предели, парализирајќи го сообраќајот и затворајќи голем број училишта.
Според извештаите на New Zealand Herald, студениот воздушен систем брзо се прошири низ земјата, а најпогоден е Јужниот Остров. Полицијата во градот Дунедин упати итен апел до граѓаните да не тргнуваат на пат без пречка потреба поради заснежените и замрзнати коловози, додека за главните сообраќајници се издадени предупредувања за опасни услови за возење.
Невремето целосно го прекина и образовниот процес, сите основни и средни училишта, како и градинките во регионот на Дунедин и Палмерстон, останаа затворени.
Студениот бран донесе хаос и во поморскиот сообраќај. Во Куковиот Проток, кој ги раздвојува Северниот и Јужниот Остров, силните ветрови и високите бранови предизвикаа откажување на десетици фериботски линии. Државната метеоролошка служба MetService предупреди дека долж брегот на Ваирарапа се очекуваат бранови со височина и до шест метри.
Иако снегот во низините е ретка појава за Нов Зеланд, метеоролозите потсетуваат дека на јужната хемисфера моментално е самиот пик на зимската сезона.
© Vecer.mk, правата за текстот се на редакцијата
