Иако гигантот Meta веќе се соочи со неколку неповолни судски одлуки поради начинот на кој нејзините платформите ги таргетираат младите корисници, судењето што започнува утре би можело сериозно да го загрози нејзиното целокупно работење. Постапката е покрената врз основа на тужба што во 2023 година ја поднесоа 30 американски сојузни држави, меѓу кои се Калифорнија и Њујорк, пишува BBC.
Во тужбата се наведува дека компанијата ги прекршила сојузните и државните закони за заштита на приватноста на децата. Државите не бараат само отштета која надминува 860 милијарди евра, туку бараат и конкретни промени во функционирањето на Instagram и Facebook. Меѓу нив се укинување на приказот на бројот на лајкови и прекинување на опцијата за бесконечно скролање содржини (endless scrolling).
Доколку Meta го изгуби овој судски спор, ќе биде принудена темелно да го промени начинот на кој младите ги користат нејзините социјални мрежи.
Барања за ригорозни промени на Instagram и Facebook
Сојузните држави кои ја поднесоа тужбата бараат и низа други измени во однос на младите корисници:
- Воведување родителска верификација за сметките на тинејџерите;
- Промена на алгоритмите кои препорачуваат содржини;
- Отстранување на филтрите за измена на физичкиот изглед;
- Исклучување на автоматското пуштање видеа (auto-play);
- Забрана за отворање повеќе кориснички сметки од едно лице;
- Укинување на објавите кои исчезнуваат, како што се Instagram Stories.
Државите тврдат дека сите овие опции се намерно дизајнирани за да ги задржат корисниците, особено децата и тинејџерите, што е можно подолго и почесто на платформите. Во тужбата се истакнува и дека Meta им отежнува на младите да ги намалат апликациите бидејќи постојано им испраќа известувања (notifications) кои ги поттикнуваат да се вратат. Аргументите ќе се изнесат пред судијката Ивон Гонзалес Роџерс, главна сојузна судијка во Калифорнија.
Meta е обвинета дека свесно ги таргетирала децата и одлучила да ги искористи за да ги зацврсти на своите платформи, со што го зголемила бројот на корисници и го проширила бизнисот.
Компанијата ги отфрла обвинувањата:
„Остро се спротивставуваме на овие тврдења и уверени сме дека доказите ќе ја покажат нашата долгогодишна посветеност за поддршка на младите“, изјави портпаролката на компанијата.
Претходна пресуда во Њу Мексико
Во една од неодамнешните пресуди против Meta, судија во Њу Мексико ја казни компанијата со 942 милиони долари и ѝ наложи промени слични на оние што сега ги бараат и останатите држави. Судијата Брајан Бидшајд нареди отстранување на бројачот на лајкови на Instagram и Facebook за корисници помлади од 18 години, забрана за испраќање и примање содржини со голотија, како и ограничување на нотификациите во одредени делови од денот.
Судијата ја прогласи Meta за „јавна штета“ и ја спореди со фабрика која го загадува воздухот и му штети на целото население. Meta најави жалба на оваа одлука.
Иако пресудата на судијата Бидшајд се однесува само на Њу Мексико, доколку тужбата на 30-те држави успее, Meta ќе мора да ги воведе промените на територијата на целите САД, земји кои опфаќаат речиси две третини од вкупното американско население.
© Vecer.mk, правата за текстот се на редакцијата
