Редовното консумирање кафе е поврзано со промени во функционирањето на дигестивниот систем, вклучувајќи почести контракции на дебелото црево и поголема разновидност на цревни бактерии, според истражувањето на Универзитетот во Копенхаген објавено во научното списание „Гут Микробиологија“.
Во истражувањето учествувале 61 здрав возрасен испитаник од Данска, кои биле поделени во две групи во зависност од фреквенцијата на консумирање кафе, објавува Јуронуз.
Научниците користеле мала електронска капсула што ја голтале учесниците, која мерела температура, киселост, време на варење и цревни контракции додека минува низ дигестивниот тракт.
Резултатите покажале дека луѓето кои редовно пијат од една до пет шолји кафе дневно имаат поразновиден состав на цревни микроорганизми, како и пониско ниво на киселост во тенкото црево во споредба со оние кои консумираат кафе поретко.
Истражувачите, исто така, воспоставиле врска помеѓу поголемата потрошувачка на кафе и почестите контракции на дебелото црево, односно мускулните движења кои овозможуваат движење на содржината низ дигестивниот систем и придонесуваат за редовно празнење на цревата.
Водечкиот автор на студијата, Франческа Бучи од Универзитетот во Копенхаген, изјави дека редовното консумирање кафе се чини дека влијае на физиолошките процеси во цревата, додека вонредниот професор и раководител на истражувачката група Хенрик Мунк Ројагер посочи дека претходните истражувања, исто така, го покажуваат влијанието на кафето врз различните процеси во дигестивниот систем.
Научниците, сепак, нагласуваат дека студијата не докажува дека кафето директно ги предизвикува забележаните промени.
Исто така, сè уште не е утврдено дали намалената киселост во тенкото црево има позитивен или негативен ефект врз здравјето.
Како следен чекор, истражувачите планираат контролирана студија во која ќе ја утврдат количината на кафе консумирана од учесниците, со цел попрецизно да утврдат дали кафето е одговорно за промените во варењето и цревната активност.
© Vecer.mk, правата за текстот се на редакцијата
