ОЛОВО, ЦИНК, БАКАР И ЗЛАТО ВО ФОКУСОТ - Минералното богатство на Македонија со долгорочна развојна рамка до 2046 година

Vecer | 10.10.2026

ОЛОВО, ЦИНК, БАКАР И ЗЛАТО ВО ФОКУСОТ - Минералното богатство на Македонија со долгорочна развојна рамка до 2046 година
Додај го Вечер како твој извор на Google (се отвора во нов таб)

Владата ја усвои Стратегијата за геолошки истражувања и одржливо искористување и експлоатација на минералните суровини за периодот 2026–2046 година, со која се утврдуваат приоритетите за современи геолошки истражувања, одговорно управување со минералното богатство и создавање услови за долгорочни инвестиции, соопшти Министерството за енергетика, рударство и минерални суровини.

Според Министерството, со долгорочниот план ќе се создадат услови за подобро искористување на геолошкиот потенцијал на Македонија и негово претворање во инвестиции, индустриски развој, нови работни места и поголема додадена вредност за домашната економија.

„Македонија располага со разновиден геолошки потенцијал, кој вклучува олово, цинк, бакар, злато, антимон и никел, како и мермер, травертин, гранит и варовник. Еден од главните приоритети е поголем дел од економската вредност да се создава во земјата. Тоа подразбира посилно поврзување на рударството со домашното производство, развој на преработувачки и други индустриски капацитети и примена на современи технологии. Подобрените геолошки истражувања ќе овозможат попрецизно утврдување на потенцијалот и навремено планирање на идните инвестиции. Со тоа се отвора простор за нови деловни активности и зајакнување на домашните производствени капацитети“, наведува Министерството.

Оттаму додаваат дека паралелно се поставуваат повисоки стандарди за заштита на животната средина, транспарентност и заштита на јавниот интерес.

Стратегијата е усогласена со европските политики, вклучително и со Европскиот акт за критични суровини, што, според Министерството, создава можности за поголемо вклучување на Македонија во европските индустриски синџири.

Документот е подготвен во рамките на стручната соработка меѓу Македонската академија на науките и уметностите (МАНУ) и Министерството за енергетика, рударство и минерални суровини, со учество на експерти и консултации со релевантни институции и претставници на стручната јавност.

Стратегијата е усвоена од Владата на предлог на Министерството за енергетика, рударство и минерални суровини и претставува долгорочна рамка за развој на геолошките истражувања и рударството до 2046 година.

„Со овој документ се создава основа минералното богатство да не биде само предмет на експлоатација, туку и двигател на домашната индустрија, инвестициите и долгорочниот економски развој, со одговорно управување и зачувување на животната средина“, информира Министерството.

© Vecer.mk, правата за текстот се на редакцијата

Vecer.mk е прв македонски информативен портал, основан во 2004 година.

2004-2026 © Вечер, сите права задржани

Сите содржини и објави на vecer.mk се авторско право на редакцијата. Делумно или целосно преземање не е дозволено.

Develop & Design MAKSMEDIA LTD Skopje Copyright © 2004- 2026. Vecer.mk