Една година откако Високиот суд во Лондон донесе историска пресуда во корист на глобалните компании за лизинг, финансиските превирања предизвикани од запленувањето на повеќе од 400 патнички авиони во Русија продолжуваат да ги диктираат условите во целата глобална авијациска индустрија.
Додека конечната исплата на штетите тешки повеќе од осум милијарди долари завршува во Лондон, патниците ширум светот ги чувствуваат последиците од оваа правна битка директно врз своите паричници преку сè поскапите авионски билети.
Сè започна по воведувањето на западните санкции и одговорот од официјална Москва, кога руските власти им дозволија на домашните авиокомпании да задржат и повторно да регистрираат повеќе од 400 патнички авиони што беа изнајмени од западните гиганти за лизинг како што се AerCap и SMBC Aviation Capital. Вкупната вредност на оваа заробена флота беше проценета на десетици милијарди долари, што предизвика невидени превирања на финансиските и авијациските пазари.
Со оглед на тоа што сите обиди за физичко враќање на авионите целосно пропаднаа, сопствениците на авионите решија да ги активираат своите обемни полиси за осигурување. Сепак, водечките осигурителни компании, предводени од познатиот лондонски гигант „Лојдс“, долго време одбиваат да платат отштета со образложение дека масовното запленување на авиони под режим на меѓународни санкции не е опфатено со стандардните полиси за воен ризик. Покрена серија исклучително сложени постапки во кои учествуваа стотици адвокати и претставници на повеќе од 40 глобални корпорации.
Иако судот во Лондон пресуди во корист на сопственикот на авионите, обемот на овој спор целосно го трансформираше осигурителниот систем. Поради огромните загуби што мораа да ги покријат осигурителите и фондовите за реосигурување, премиите за осигурување за сите светски авиокомпании драстично се зголемија во изминатата година. Тие оперативни трошоци беа префрлени директно на крајните корисници, па цените на летовите на глобално ниво достигнаа рекордни износи.
Покрај поскапите билети, условите за изнајмување авиони за компании од земји со зголемен геополитички ризик станаа значително поригорозни и поскапи, поради што овој случај трајно ги промени правилата на играта во глобалниот воздушен сообраќај.
© Vecer.mk, правата за текстот се на редакцијата
