Цените на нафтата во понеделникот повторно значително пораснаа, при што двата главни референтни типа на сурова нафта Брент/Brent и ВТИ/WTI – се искачија над 100 долари за барел. Брент достигна околу 107,8 долари, додека американскиот ВТИ се тргуваше над 102 долари за барел, објави Ројтерс.
Растот на цените се должи на ескалацијата на конфликтот на Блискиот Исток и зголемените стравувања дека нападите врз нафтената инфраструктура и транспортните рути би можеле дополнително да го нарушат глобалното снабдување со енергенси. Дополнителен притисок врз пазарот создава и прекинот на работата на важната саудиска Исток-Запад нафтена цевководна мрежа по напад со дронови.
Инвеститорите особено го следат развојот на ситуацијата околу Ормускиот теснец и Баб ел-Мандеб, клучни транспортни коридори за глобалната трговија со нафта. Продолжувањето на нарушувањата во снабдувањето би можело дополнително да ги зголеми цените и да создаде нов инфлаторен притисок врз светската економија.
© Vecer.mk, правата за текстот се на редакцијата
