Убиен е 20-годишниот француски државјанин Мигел Мендес во Ксамил, а албанската полиција веќе го уапси осомничениот за крвавиот напад. Младиот Французин бил пронајден без знаци на живот во раните утрински часови на лежалка на плажа, а според првичните информации, бил избоден со нож. Како осомничен за убиството е посочен 29-годишниот Сократ Вата од Хас, кој по инцидентот побегнал од местото на настанот.
По него веднаш беше организирана полициска потрага, а осомничениот на крајот бил пронајден на контролен пункт во Леван, во областа Фиер.
Полицијата го открила Вата скриен во багажникот на автомобил управуван од 31-годишна турска државјанка. Во возилото се наоѓал и 38-годишен турски државјанин.
Осомничениот и двајцата турски државјани биле приведени и спроведени во Регионалната дирекција на полицијата во Валона за понатамошни процесни дејствија.
Албанската полиција соопшти дека истражниот тим, под раководство на Обвинителството, продолжува со работата на целосно расветлување на случајот и документирање на сите околности поврзани со убиството.
Истрагата треба да утврди што точно му претходело на нападот и кои биле мотивите за смртоносниот напад врз младиот француски турист.
© Vecer.mk, правата за текстот се на редакцијата
