Минималната плата во Србија ќе биде зголемена на околу 600 евра месечно, доколку биде усвоен предлогот на Владата за раст на минималната цена на трудот за 9,2 проценти. Со предложеното зголемување, минималната цена на работниот час би пораснала од 371 на 405 динари, што би значело месечна минимална заработка од 70.470 динари, односно околу 600 евра. Иако Владата, работодавачите и синдикатите денеска не постигнаа договор, министерот за финансии Синиша Мали посочи дека при одлуката се земаат предвид шест економски параметри, меѓу кои БДП, инфлацијата, состојбата на пазарот на трудот и макроекономската стабилност.
Министерот рече дека таквата одлука, ако сè оди добро, ќе биде донесена веќе на следната седница на Владата.
Мали изјави дека стапката на раст на српската економија во вториот квартал од оваа година изнесувала 3,6 проценти, како и дека раст е забележан и во текот на првиот квартал.
– Ние сме една од најбрзо растечките економии во Европа, што е добро. Врз основа на првите два квартала, планираме растот на БДП оваа година да биде над три проценти, односно помеѓу 3,2 и 3,3 проценти – рече Мали.
Според него, стапката на економски раст е еден од факторите што влијаат врз одредувањето на минималната плата за следната година.
Министерот за финансии истакна дека Србија ја зачувала макроекономската стабилност и дека учеството на јавниот долг во БДП е 43,7 проценти.
„Двојно сме подобри отколку кога станува збор за Европската Унија“, рече Мали.
Зборувајќи за пазарот на трудот, тој изјави дека стапката на невработеност е стабилна и изнесува 8,9 проценти, потсетувајќи дека во 2012 година достигнала 25,9 проценти.
Мали рече дека трендот на инфлацијата е особено охрабрувачки, наведувајќи дека во јуни била 1,9 проценти.
Тој потсети и на критиките што се појавија по регулирањето на цените во супермаркетите, според кои Србија наводно би можела да се соочи со ненадејно зголемување на цените.
„Тие рекоа дека после тоа ќе има експлозија на цените во Србија, и како што можете да видите, тоа не се случи, токму благодарение на одговорната политика на Владата на Република Србија“, рече Мали.
Бидејќи на Социјалниот и економски совет не беше постигнат консензус, конечната одлука за минималната плата за следната година ќе ја донесе Владата на Србија на една од следните седници, пишува Блиц.
© Vecer.mk, правата за текстот се на редакцијата
