Хрватската Влада предлага нова мерка со која најранливите граѓани ќе добијат дополнителна заштита од исклучување на електричната енергија. Со измените на Законот за пазар на електрична енергија, кои се доставени во собраниска процедура, се предвидува забрана за прекин на снабдувањето за ранливите потрошувачи и домаќинствата погодени од енергетска сиромаштија.
„Со законот, дополнително ја зајакнуваме заштитата на потрошувачите на електрична енергија преку поголем избор на модели на договори и подобра заштита на ранливите и енергетски сиромашни потрошувачи, изјави министерот за економија Анте Шушњар на седницата на Владата.
Покрај таа мерка за заштита на потрошувачите, предложените законски измени бараат и добавувачите да воспостават систем за управување со ризици со цел да се ограничи ризикот од неисполнување на обврските на клиентите со примена на соодветни стратегии за заштита.
Според предложеното законодавство, добавувачите ќе мора да ги предупредат потрошувачите за невообичаено големо зголемување на потрошувачката на енергија, да им понудат флексибилни планови за отплата на долгот, да ги советуваат за нивниот долг, да промовираат едукација за нивните права во врска со управувањето со долгот, а исто така да им дадат пристап до финансирање, вредносни купони или субвенции за да им помогнат во плаќањето сметки.
Дополнително, законските измени предвидуваат обврска на клиентите на електрична енергија да им се понудат низа договори што најдобро одговараат на нивните околности.
© Vecer.mk, правата за текстот се на редакцијата
