Судири меѓу мигрантите и полицијата избувнаа во привремениот сместувачки центар за баратели на азил во Синтики, на северот на Грција, во близина на границата со Бугарија. По ескалацијата на ситуацијата, во кампот интервенирала и елитната полициска единица за справување со немири од Солун.
Тензијата започна откако мигрантите фрлаа камења кон обезбедувањето. Дополнителни полициски и специјални единици беа испратени на местото на настанот, користејќи шок бомби за да ги контролираат немирите. Беше распоредено силно полициско засилување, вклучително и единица на полицијата за немири од Солун. Судирите продолжиле и во неделата.
За време на немирите, мигрантите успеаја да пробијат дел од оградата на центарот и 35 лица избегаа. Полицијата приведе 17 од нив, а околу 18 лица сè уште се бараат, соопштија грчките власти.
Петмина мигранти беа повредени во инцидентот и однесени во болница. Центарот во Синтики сместува околу 450 лица додека се обработуваат нивните барања за азил.
Синтики се наоѓа во непосредна близина на бугарската граница. Грција е една од главните точки на влез за мигрантите во Европа, а миграцијата останува чувствително политичко прашање во земјата. Владата во Атина води политика на заострување на контролите за миграција.
© Vecer.mk, правата за текстот се на редакцијата
