Австриската полиција нуди награда од 5.000 евра за каква било информација за српската државјанка Маријана Мијаиловиќ (44), попозната како лажната шаманка „Амела“, која успешно ги избегнува европските органи за спроведување на законот веќе година и пол.
Таа е обвинета за измама на граѓани за повеќе од 10 милиони евра преку шамански ритуали на „чистење“, додека членовите на нејзиното семејство веќе се во затвор во Австрија поради овие измами.
Се сомнева дека Маријана, претставувајќи се како видовита и шаманка, им наштетила на граѓани низ Австрија, Германија и Швајцарија за износ поголем од 10 милиони евра. Според европските медиуми, голем број луѓе од Балканот се меѓу измамените.
Под самиот базен е откриен таен сеф, во кој имало дукати, златни прачки, скапи часовници и огромни суми пари.
Конечните пресуди за нејзините најблиски соработници беа изречени од австрискиот суд пред неколку месеци. Снаата се изјасни за виновна и доби четири години затвор, додека синот Франческо и поранешниот сопруг беа осудени на по три години за перење пари, криминален заговор и сериозна измама.
Сепак, жртвите доживеаа делумно разочарување на судот. Иако вкупната штета се проценува на повеќе од 10 милиони евра, судот наложи само околу 1,5 милиони да им се вратат на оштетените.
Одбраната успеа да докаже дека значителен дел од запленетиот имот доаѓа од наследства и наводно легални зделки со недвижности, бидејќи обвинителството не можеше директно да го поврзе секое евро со измамените лица.
Го промени изгледот и исчезна без трага
Австриската полиција предупредува дека Маријана е исклучително вешта во криењето на својот идентитет. Оперативните податоци укажуваат дека таа драстично го променила својот личен опис, го променила стилот на облекување, должината и бојата на косата и веројатно користи лажни документи за да се движи низ Шенген или да се крие некаде на Балканот.
Европските полициски служби ги повикуваат сите граѓани кои го препознаваат нејзиното лице од потерницата или имаат какви било информации за нејзините движења веднаш да се јават во најблиската полициска станица.
© Vecer.mk, правата за текстот се на редакцијата
