Албанската полиција соопшти дека уапсила маж кој е осомничен за убиство на 20-годишен португалски државјанин. Злосторството се случило рано утрото во вторникот во Ксамил, на југот на Албанија, пишува „Албаниан дејли њуз“.
Жртвата е идентификувана како Луис Мигел Варела Мендес. Според полицијата, конфликтот започнал во барот на плажата „Принсипотес“, наводно по расправија поврзана со девојка. Неколку келнери биле обвинети дека ја удирале жртвата пред тепачката да се пресели на плажата во соседниот бар „Парадајс“.
Таму, како што вели полицијата, 29-годишниот Давид Ертевен продолжил да го удира Мендес, додека 29-годишниот чувар Сократ Вата неколку пати го избодел со нож. Осомничениот за убиството е познат и под името Сократ Липан. Тој е уапсен во вторникот утрото во местото Леван кај Фиер, откако полицијата го пронашла како се крие во багажникот на еден автомобил.
Полицијата извести дека Липан го превезувале кон Тирана во автомобил со кој управувала 31-годишната турска држајанка Езги Перлак. Во возилото се наоѓал уште еден турски државјанин, 38-годишниот Нух Махмутоглу. Властите тврдат дека го познавале осомничениот и го сокриле во автомобилот за да му помогнат да го напушти подрачјето.
Во рамките на истрагата, полицијата приведе 41 лице на разговор во полициската станица во Саранда. Уапсени се вкупно 10 лица. Освен Липан, уапсени се Перлак, Махмутоглу, Серџи Селими (24), Ервис Бунци (24), Илди Чекани (21), Мурат Жабина (27), Миосид Матушај (24), Лучијано Сефери (44), Ромео Шеху (35) и Кристи Коши (29).
Полицијата наведува дека уапсените албански државјани се жители на различни градови и региони во Албанија, додека Перлак и Махмутоглу се турски државјани. Властите исто така распишаа потрага по Ертевен и 36-годишниот Беким Булица, двајцата од Тирана, поради поврзаност со истрагата.
Полицијата и обвинителството продолжуваат да работат на утврдување на сите околности за убиството и улогите на сите лица кои наводно биле вмешани. Истрагата сè уште е во тек, пишува „Албаниан дејли њуз“.
© Vecer.mk, правата за текстот се на редакцијата
