- Грчките цариници можеби не се во официјален штрајк, но во бел се сигурно. Мислам дека дури и намерно се изживуваат на овие пеколни температури, вели Лидија Горачинова-Илиева, професорка на Универзитетот во Штип.
- Два часа во колона, се движиме со брзина на желка и сѐ уште не ја гледаме границата. Да ти преседне одморот и да не ти текне уште еднаш да отидеш во Грција, вели таа откако вчера се најде во огромните колони на граничниот премин „Евзони“.
На коментарите дека е продолжен викенд и стандард за лето, додава дека на одмор во Грција била сигурно над 30 пати, но вака не било.
Жалби за бавното поминување на границите на групите за патување се споделуваат и од Срби, кои пак, за да ја избегнат гужвата на македонско-грчката граница, одбрале да патуваат преку Бугарија.
Бел штрајк е вид на тивок протест каде работниците строго ги почитуваат законите и правилата, но работат бавно и без ентузијазам, намалувајќи ја продуктивноста.
Грчките граничари уште од почетокот на воведувањето на новиот систем преку синдикатите им дадоа до знаење на властите дека обемот на работа е драстично зголемен и нехуман.
© Vecer.mk, правата за текстот се на редакцијата
