Македонските државјани кои овој викенд патуваат кон Грција треба да очекуваат значителни сообраќајни застои, временски ограничувања на патиштата и затворени трговски објекти. Поради празникот Успение на Пресвета Богородица, грчките служби активираат посебен сообраќаен план, додека во регионот на Халкидики е прогласен многу висок ризик од пожари. Патниците се советуваат внимателно да ги планираат рутите и да го прилагодат времето на тргнување пред да пристигнат на граничните премини Богородица и Дојран.
Грчката полиција спроведува посебен план за регулирање на сообраќајот на целата патна мрежа, со акцент на патиштата кои водат кон Халкидики и летните туристички центри. За растоварување на патиштата се воведуваат временски забрани за движење на товарни возила со тежина над 3,5 тони.
Забраната за камиони важи во правец на излез од големите градови во петок од 16:00 до 22:00 часот и во сабота од 08:00 до 13:00 часот. За враќање, ограничувањето ќе важи во недела од 16:00 до 23:00 часот. Овие мерки директно ги опфаќаат клучните делници Солун – Неа Муданија, Солун – Полигирос, како и делови од автопатот А1 од Евзони кон Солун. Иако мерката не важи за патнички возила, временските термини го покажуваат периодот кога сообраќајниот притисок ќе биде најсилен.
Покрај сообраќајните гужви, дополнителен проблем во Халкидики и Света Гора е прогласената категорија 4 за висок ризик од пожари од страна на грчката Цивилна заштита. Во неколку други региони во земјата ризикот е подигнат на највисокото, петто ниво.
На полуостровот Касандра веќе се регистрирани активни пожари во областа Сивири, поради што сообраќајната полиција повремено ги пренасочува возилата по споредни рути. Службите апелираат на максимална претпазливост и избегнување какви било активности на отворено кои можат да предизвикаат искрење, особено во камповите и викенд-населбите.
Празничниот режим директно ќе влијае и врз снабдувањето на туристите. Во сабота, на 15 август, сите големи синџири на супермаркети како „Lidl“, „Masoutis“, „AB Vassilopoulos“ и „Sklavenitis“ ќе бидат затворени. Бидејќи недела е исто така неработен ден за големите маркети, редовното работење ќе се врати дури во понеделник.
Работата на аптеките на 15 август исто така ќе биде ограничена исклучително на дежурни објекти. Помалите локални продавници и мини-маркети во туристичките места ќе можат да работат со прилагодено работно време. Бензинските пумпи ќе сообраќаат според ротациски дежурства, но на патниците им се препорачува да обезбедат гориво и основни намирници пред да започне празничниот викенд.
© Vecer.mk, правата за текстот се на редакцијата
