Србија денеска се соочува со драстичен температурен пресврт. Додека во дел од земјата утрово беа измерени невообичаено високи температури за средината на ноември и до 24 степени, студен фронт веќе пристигна во северна Војводина, носејќи обилни дождови, силен ветер и снег во попладневните и вечерните часови.
Поради јужно струење и изразен феноскандинавски ефект, утрово во Ваљево беа регистрирани 24 степени, во Пожега и Смедеревска Паланка 23, додека на Златибор температурата достигна 17 степени.
Наспроти пролетните температури на југ и во централните делови, на северот на земјата веќе започна значително заладување со силен северозападен ветер. Во Суботица и Сомбор живата на термометарот падна на 10 степени, што е најава за бранот кој во текот на денот ќе ја зафати целата држава.
Во вечерните часови се очекува дождот на планините во западна, југозападна и јужна Србија да премине во интензивни снежни врнежи. Температурата на Златибор од утринските 17 степени за неколку часа ќе се спушти на нула, а до сабота наутро, 14 ноември, се очекува формирање на снежна покривка.
Поради температурниот пад од над десет степени за краток период, дождот и силниот ветер, на возачите им се препорачува зголемена претпазливост, особено на планинските патни правци каде во текот на ноќта ќе има снег и лизгави коловози.
© Vecer.mk, правата за текстот се на редакцијата
