Светот се менува, но дали на подобро. Воспитувањето и учењето наместо родителите и учителите маркетинг експертите им го предадоа во рацете на социјалните мрежи кои од децата прават жртви на тој бизнис.
Ова е само најновиот пример заради кој, колку е можно подбрзо, треба да се воведат забрани за социјални мрежи за младите до 15-тина години.
Медиумите неодамна ја објавија веста за момче од Бјеловар кое претрпе сериозни повреди поради наводен интернет предизвик со оган, а експертите предупредуваат дека ова е за жал многу честа практика што треба да се запре.
Според извештаите, тинејџерот бил примен во болница со екстремно тешки изгореници, по што итно бил префрлен во Загреб на интензивно лекување. Неговата состојба е опишана како критична, а лекарите се борат за неговиот живот.
Полицијата потврди дека добила пријава и дека е во тек кривична истрага за да се утврдат сите околности на настанот, додека во исто време се шпекулира дека причина за несреќата бил интернет предизвик од социјалните мрежи. Иако сè уште нема официјална потврда, ова не е прв случај на смрт на деца поради љубопитност и недоволна свест за потенцијалните последици.
Катарина Јонев, едукаторка на деца и родители за безбедност на интернет, во неколку наврати предупреди дека децата многу често се согласуваат на опасни предизвици само за да го привлечат вниманието на публиката на мрежите.
- Да не заборавиме дека алгоритмите на социјалните мрежи фаворизираат содржина што предизвикува реакции. Кога децата ќе видат дека ваквите видеа имаат десетици или стотици илјади прегледи, може да почувствуваат потреба и самите да направат нешто слично за да бидат забележани, прифатени или „популарни“ - рече Јонев.
Таа истакна дека децата се многу мудри, а честопати родителите не можат целосно да го разберат нивното однесување.
- Најголемиот број предизвици во Србија се преземени од Тик-Ток. Сепак, децата станаа посвесни дека нивните родители лесно можат да ги контролираат на гореспоменатата социјална мрежа, што создаде страв кај нив. Тие имитираат предизвици од интернет, а потоа ги споделуваат во групи на Вибер и на тој начин ги кријат своите постапки од своите родители. Децата се мудри и знаат како лесно да ги измамат своите родители - изјави Јонев за Информер во неколку наврати.
Таа објасни дека предизвиците имаат многу негативен ефект врз децата, бидејќи се ставаат во потенцијална опасност докажувајќи се.
- Предизвиците влијаат врз децата исклучително негативно. Ако детето изврши опасна задача, тоа може да има физички, психолошки, па дури и фатални последици, а во случај на одбивање, ќе биде окарактеризирано како слабак.
Ако детето е доволно зрело да не го прифати предизвикот, ќе биде наречено кукавица и ќе биде изоставено од општеството, поради што многумина се согласуваат на морбидни игри. Целта на жртвите на предизвикот е да се докажат, а тие се охрабруваат затоа што се изложени на исклучително несоодветна содржина на интернет и немаат развиена критичка свест, затоа не размислуваат за можните последици - рече Јонев.
© Vecer.mk, правата за текстот се на редакцијата
