Оставка на премиерот Еди Рама, формирање на техничка влада со едногодишен мандат и коренити уставни реформи се најдоа на новиот, радикализиран список со барања на организаторите на „Фламинго револуцијата“ во Албанија. Бранот граѓански незадоволства кој започна како локален еколошки револт, сега се претвори во масовно национално движење, а демонстрантите порачаа дека нема да се тргнат од улиците сè додека нивните услови не бидат исполнети до последен.
Идејата на организаторите е по итното заминување на актуелната власт да се формира непартиска, експертска преодна влада. Овој привремен кабинет во рок од 12 месеци би имал задача да ги подготви клучните институционални промени. Рама се наоѓа под невиден притисок бидејќи меѓу предложените уставни измени се бара ограничување на функцијата премиер на најмногу два мандата и воведување драстични механизми за еднаквост на граѓаните пред законот, кои на крајот би се потврдувале на референдум. Демонстрантите дополнително инсистираат на итно поништување на спорните законски решенија за заштитени подрачја и за културно наследство.
Три недели хаос, кршење огради и брутално насилство
Тензиите во земјата ескалираат веќе три недели, односно од моментот кога тешките булдожери почнаа да ги пустошат шумите и древните песочни дини за да го подготват теренот за мега-градежен потфат во заштитено подрачје спроти островот Сазан. Конфликтот доживеа врв кога еколошките активисти и граѓаните се судрија со приватното обезбедување кое постави огради за да го блокира пристапот до јавното добро. Во јавноста протекоа и вознемирувачки снимки на кои се гледа како обезбедувачите со лисици влечат локален земјопоседник по карпест и нерамен терен.
Како луксузниот мега-проект на фамилијата Трамп ги крена масите?
Целиот револт изби поради контроверзниот проект за изградба на ексклузивен луксузен туристички комплекс поврзан со Џаред Кушнер, зетот на американскиот претседател Доналд Трамп. Меѓутоа, движењето преку ноќ ги прошири своите барања и еволуираше во сеопшта граѓанска иницијатива која удира по темелите на системот. Незадоволните граѓани гласно предупредуваат и на мизерно ниските плати, астрономските животни трошоци и масовното иселување на младите, директно обвинувајќи го Рама за социјална катастрофа.
Бранот веќе не може да се локализира само во Тирана, бидејќи масовни собири на поддршка за „Фламинго револуцијата“ се организираат и низ албанската дијаспора во САД, Велика Британија, Канада, Франција, Германија, Италија, Шведска и Австралија. Организаторите се децидни дека битката ќе продолжи сè додека не се отвори процес за нов, праведен општествен договор меѓу државата и нејзините граѓани.
© Vecer.mk, правата за текстот се на редакцијата
