Специјалното обвинителство на Албанија (СПАК) нареди итно апсење на 10 албански државјани, осомничени како членови на една од најмоќните криминални мрежи во регионот, пренесува „Albanian News Daily“.
Кланот се товари дека во периодот од 2019 до 2021 година прошверцувал дури 50 тони кокаин од Латинска Америка во Европа и испрал десетици милиони евра преку градежништво и луксузни недвижности во земјата. Специјалниот суд одобри притвор за десетчлената група.
Истрагата до детал откри пет огромни меѓународни пратки со кокаин кои биле директно координирани од оваа организација низ неколку клучни европски и светски пристаништа. Меѓу нив е и заплена од 700 килограми кокаин во белгиски Антверпен, каде дрогата била скриена во контејнер со автомобили и резервни делови, како и пресретнати 2.010 килограми во Гвајакил, Еквадор, кои биле на пат кон Холандија во јуни 2020 година. Истражителите ја поврзуваат мрежата и со заплена на 1,1 тон кокаин во Ротердам, рекордна пратка од 4,1 тон пресретната во Холандија во декември истата година, како и со спречен обид во 2021 година за транспорт на повеќе од еден тон кокаин од Колумбија кон Франција.
Огромните суми на пари заработени од шверцот со наркотици во готово биле внесувани во Албанија, каде групата користела сложени финансиски шеми, фиктивни купувања на удели и подизведувачки фирми за да го прикрие криминалното потекло. Милионите потоа биле инвестирани во големи градежни проекти, луксузни вили, хотели, трговски компании и атрактивни земјишта долж албанското крајбрежје.
© Vecer.mk, правата за текстот се на редакцијата
