По долгиот лет преку Грција и Турција, царскиот орел Феликс стигнал до Сирија, каде што паднал во рацете на илегални трговци со диви птици, но по успешното спасување и повеќемесечниот престој во прифатилиште во Либан, вчера конечно пристигна во Србија. Птицата синоќа околу 21:30 часот беше сместена во Прифатилиштето за строго заштитени видови на Зоолошката градина Палиќ, каде што го започнува процесот на закрепнување и подготовка за враќање во природата.
„Синоќа не го пуштивме веднаш во големиот простор поради мракот и за да не биде дезориентиран, туку се одлучивме за внатрешна волиера. Птицата беше видно уморна и исплашена, но покажуваше нормални знаци на живот и беше заинтересирана за околината“, ги објаснува првите моменти по пристигнувањето на Феликс, биологот Анѓелија Стокин. Откако првата ноќ ја помина во затворен простор, Феликс утринава беше префрлен во големиот авијариум за разлетување, каде што тимот експерти можеше подетално да ја процени неговата состојба.
„Тогаш сфативме дека е исклучително љубопитна птица, дека е здрав и дека има огромен потенцијал да се врати назад во природата. Ние се надеваме дека тоа и ќе се случи во што е можно пократок период. Тој сè уште не лета, но трча, го истражува просторот и ги слуша околните звуци, покажувајќи живост и интерес за околината“, наведува Стокин, додавајќи дека птицата сега се наоѓа во значително поголем простор од оној во кој престојувала изминатите шест месеци, поради што сè уште е малку претпазлива.
Иако пристигнувањето на царскиот орел предизвика големо внимание во јавноста, посетителите на Зоолошката градина Палиќ нема да имаат можност да го видат.
„Посетителите немаат можност да ги видат птиците во прифатилиштето, поради здравствената безбедност и поради тоа што станува збор за птици кои целиот живот го поминале во дивината и не се навикнати на нагли движења и разни звуци. Тие ќе ја имаат својата приватност во авијариумот за разлетување, бидејќи нашата крајна цел секако е да ги вратиме во дивината“, вели соговорничката на порталот Суботица.
Според препораката на ветеринарот, птицата сега мора да помине 21 ден во задолжителен карантин. Во текот на овој период ќе ги помине сите неопходни здравствени протоколи пред да се донесе одлука за точниот термин на неговото пуштање на слобода.
Да потсетиме: Феликс се извел кај Бачка Топола, а во октомври минатата година бил прстенуван и му бил поставен сателитски предавател. По долгиот лет преку Грција и Турција, овој царски орел стигнал до Сирија, каде што исчезнал од сателитскиот радар и паднал во рацете на криумчари со диви животни. По повеќемесечна меѓународна акција за спасување, птицата била спасена од криумчарите и привремено сместена во прифатилиште во Либан, од каде што вчера конечно беше донесена во Србија.
© Vecer.mk, правата за текстот се на редакцијата
