Украинскиот претседател Володимир Зеленски даде интервју за Си-Ен-Ен и потврди дека украинската контраофанзива оди многу побавно од очекуваното.
Според него, има неколку причини за тоа - тој тврди дека тоа се должи на вкоренетата одбрана на Русија и фактот што Украина се уште не го добила целото потребно оружје.
Истовремено, тој ја повторува потребата од испраќање воени авиони Ф-16 во Украина. Но, факт е дека и без нив, западните сојузници на Украина очекуваа многу конкретен напредок, пробивајќи ги руските линии, дури се зборуваше и за навлегување во Крим...
Сега, откако украинската армија не успеа да окупира ниту една голема населба, а напредокот често се мери во метри, а не во километри, на Зеленски ќе му биде се потешко да обезбеди дополнителна воена поддршка.
Тековно:
• Украинскиот претседател Володимир Зеленски даде интервју за Си-Ен-Ен, каде се осврна на актуелните воени детали.
Тој посочува дека украинската контраофанзива била забавена поради вкоренетата руска одбрана, додавајќи дека посакува западното оружје да пристигнало порано за да се овозможи кампањата да започне „многу порано“.
Зеленски рече дека неговата армија „не може ни да помисли“ да изврши напад во некои области бидејќи нема „релевантно оружје“.
Како што тоа често го правеше од почетокот на војната, Зеленски исто така го искористи ова интервју за да ги повика западните земји да испратат повеќе оружје во Украина.
„Подобро сега отколку подоцна“, рече тој. Тој, исто така, го повтори своето барање за воени авиони Ф-16 од американско производство.
• Американскиот државен секретар Антони Блинкен ја повика Турција да го поддржи членството на Шведска во НАТО пред самитот на алијансата следната недела. За време на разговорите со турскиот министер за надворешни работи Хакан Фидан во средата, Блинкен ја истакна „важноста на единството на НАТО во толку критично време“ и побара од Турција да и дозволи на Шведска да се приклучи, наведува портпаролот на американскиот Стејт департмент Метју Милер.
• Спасувачките напори се во тек по смртоносниот руски ракетен напад врз станбена зграда во западниот град Лавов, соопштија украинските власти. Најмалку три лица загинаа, а осум се ранети, соопштија официјални лица.
• Најмалку 68 лица се повредени за време на украинското гранатирање во Макивка, Доњецк, јавуваат руските државни медиуми. Претходно во средата руската новинска агенција ТАСС објави дека во нападот загинал и еден маж.
Во меѓувреме, локалниот градоначалник Владислав Кључаров во изјава рече дека Макивка повторно била гранатирана во средата навечер.
„Поради гранатирањето на областа Червоногвардејски, жителите на селото Крупскаја се делумно без струја“, рече тој.
• Портпаролот на Кремљ Дмитриј Песков уште еднаш предупреди на потенцијално „катастрофалните“ провокации на украинската армија во контекст на нуклеарната централа Запорожје.
„Ситуацијата е доста напната. Постои голема закана од саботажа од режимот во Киев, што може да има катастрофални последици“, рече Песков одговарајќи на новинарско прашање за ситуацијата околу најголемата нуклеарна централа во Европа. Тој, исто така, тврди дека Кремљ ги презема „сите мерки“ за да се спротивстави на наводната украинска закана.
• Италијанската премиерка Џорџија Мелони рече дека самитот на НАТО следната недела треба да понуди „вистински безбедносни гаранции за Украина“. Говорејќи на прес-конференција заедно со нејзиниот полски колега во Варшава, Мелони, исто така, им рече на новинарите дека Полска и Италија „се во совршена согласност за ова прашање“.
Извори: The New York Times | cnbc.com | al-Jazeera | CNN
© Vecer.mk, правата за текстот се на редакцијата
