Ова се нивните пет ветувања што ќе покажат дека се промениле.
Жените ќе имаат права, но ...
Талибанците се посветени на правата на жените кои ќе имаат можност да работат и да се образуваат, изјави во вторникот портпаролот на Талибанците, Забихула Муџахид.
Но, тој нагласи дека тоа ќе биде определено со исламскиот закон. И тој е предмет на толкување на ултраконзервативното раководство на Талибанците.
Кога беа на власт од 1996 до 2001 година, тие брутално ги ограничија правата на жените.
На девојчињата им беше забрането да посетуваат училиште, а на жените не им беше дозволено да учествуваат во јавниот живот. Тие можеа само да ја напуштат куќата целосно покриени со бурка и придружувани од машки роднина.
Оние што ги прекршиле овие правила беа строго казнети, вклучително и каменување до смрт за прељуба.
Амнестија за сите
Талибанците објавија дека на сите што се бореле против нив им било простено. Ова вклучува владини службеници, полицајци и војници.
Бидејќи порано најавуваа амнестија, многумина се скептични. За време на првото владеење, тие убивале политички, верски и цивилни противници.
И во последниве месеци, тие беа обвинети за убиство на затвореници и цивили.
Комесарот на ОН за човекови права вели дека има извештаи за можни воени злосторства.
Безбедност за странци
Откако ја добија власта, тие брзо им ветија на странските влади и организации дека нивните амбасади, мисии и персонал се безбедни.
Руски дипломат рече дека ситуацијата е подобра отколку во претходното владеење.
Талибанците, сепак, имаат и лоша репутација кога станува збор за заштита на странските мисии и нивниот персонал.
Во 1996 година, тие провалија во просториите на ОН каде поранешниот претседател Наџибула гарантираше статус на бегалец, го извлекоа, го убија и го обесија телото на столб.
Две години подоцна, во Мазар-е-Шариф, тие провалиле во иранскиот конзулат и убиле девет дипломати и новинари.
Авганистан нема да биде база за напад врз други
Главната поента на американскиот договор за повлекување потпишан минатата година со Талибанците е дека тие нема да дозволат милитантни групи да дејствуваат од Авганистан.
Причината за американската инвазија на Авганистан беше одбивањето на тогашните талибански власти да го предадат Осама бин Ладен, водачот на Ал Каеда и организатор на нападите на 11 септември 2001 година.
Талибанците нагласуваат дека ќе го почитуваат потпишаното и дека не претставуваат закана за ниедна друга нација.
Последниот извештај на Советот за безбедност на ОН во јуни вели дека Талибанците и остатоците од Ал Каеда се во блиски односи.
Нема повеќе дрога
Талибанците ветуваат крај на наркотичната индустрија во Авганистан, еден од најголемите центри за производство и шверц на хероин.
Тоа е, сепак, профитабилен бизнис и големото прашање е дали талибанската влада ќе има ист пристап до финансиски институции и меѓународна помош како и претходната.
Според извештаите на ОН, Талибанците минатата година заработиле стотици милиони долари од трговијата со дрога.
© Vecer.mk, правата за текстот се на редакцијата
