Сателитските снимки од Вантор направени во последните 48 часа покажуваат значителна штета на нуклеарниот објект Натанз, најголемиот центар за збогатување ураниум во Иран и една од најчувствителните воени локации во земјата, покажа анализата на сликите од Си-Ен-Ен.
Како што е прикажано на снимката, погодени се голем магацин и две помали двокатни згради кои служеле како пристапни точки за работниците и возилата за пристап до подземните објекти.
Овој визуелен доказ е во спротивност со тврдењата на шефот на Меѓународната агенција за атомска енергија (МААЕ), Рафаел Гроси, кој претходно изјави дека „нема индикации“ за штета на нуклеарните објекти на Иран, истакнува Си-Ен-Ен.
„Немаме индикации дека некој од нуклеарните објекти е оштетен или погоден“, рече тој, додавајќи дека МААЕ продолжува да се обидува да контактира со нуклеарното регулаторно тело на Иран преку Центарот за инциденти и вонредни ситуации на МААЕ, пренесуваат американските медиуми.
Иако штетата на објектот изгледа релативно мала, таа е помала во споредба со двата американски напади на истото место во јуни минатата година, кога американските сили користеа муниција за уништување бункери и крстосувачки ракети.
Иранскиот амбасадор во Меѓународната агенција за атомска енергија (МААЕ), Реза Наџафи, вчера изјави дека за време на американските и израелските воени операции против Иран, бил погоден големиот нуклеарен комплекс во Натанз.
„Вчера, тие ги нападнаа иранските мирнодопски нуклеарни инсталации што повторно се под меѓународен надзор“, изјави Наџафи на седницата на 35-члениот Одбор на директори на МААЕ, пренесува Ал Арабија.
© Vecer.mk, правата за текстот се на редакцијата
