Лидерите на Европската унија Урсула фон дер Лајен и Антонио Кошта му рекоа на Зеленски дека тој „никогаш не бил сам“.
„Бидете силни, бидете храбри, бидете бестрашни“, напишаа претседателите на Европската комисија и на Европскиот совет во заедничката изјава на социјалните мрежи, додавајќи: „Ќе продолжиме да работиме со вас за праведен и траен мир“.
Францускиот претседател Емануел Макрон истакна дека Русија е „агресорот“ во војната и дека Западот бил во право што ѝ помогнал на Украина и ја санкционирал Русија пред три години. „Ако некој игра на картата на Трета светска војна, тоа е Владимир Путин“, рече тој, мислејќи на обвинувањата на Трамп против Зеленски.
Германскиот конзервативен лидер Фридрих Мерц, кој е фаворит да биде следниот канцелар, го увери Зеленски за поддршката на Германија. „Никогаш не смееме да ги мешаме агресорот и жртвата во оваа страшна војна. Слична порака испрати и канцеларот во заминување Олаф Шолц, додека министерката за надворешни работи Аналена Баербок додаде дека Германија ја дели „потрагата на Украина за мир и безбедност“.
Италијанската премиерка Џорџија Мелони повика на итен меѓународен самит за Украина. „Потребно е да се одржи самит без одлагање... за отворено да се разговара за тоа како имаме намера да се справиме со денешните големи предизвици, почнувајќи од Украина.“
Холандскиот премиер Дик Шуф напиша на X дека „поддршката за Украина останува непроменета. Особено сега“. Тој додаде дека Холандија сака „траен мир и крај на војната за агресија што ја започна Русија“.
Солидарност со Киев изрази и полскиот премиер Доналд Туск. „Драги украински пријатели, вие не сте сами“, му порача тој на Зеленски преку Х.
Шпанскиот премиер Педро Санчез напиша: „Украина, Шпанија е со вас“.
Британскиот премиер Кир Стармер вети „непоколеблива поддршка“ за Украина. Според соопштението на Даунинг стрит, Стармер „прави сѐ што може за да најде пат до траен мир заснован на суверенитетот и безбедноста на Украина“.
© Vecer.mk, правата за текстот се на редакцијата
