Американскиот претседател Доналд Трамп првпат се огласи по ноќните американски воени удари врз Иран, порачувајќи дека Соединетите Држави извеле силни напади врз иранските цели и дека, според него, повеќе не може да станува збор за никакво примирје меѓу Вашингтон и Техеран. Говорејќи на самитот на НАТО во Турција, Трамп изјави дека американската војска извела многу силен напад и јасно стави до знаење дека дипломатските напори се завршена приказна. Тој потенцираше дека е чисто губење време да се занимаваат со иранските власти, што според Си-Ен-Ен е најсилниот показател дека обидот за постигнување договор меѓу САД и Иран е практично пропаднат.
Овие жестоки коментари на Трамп уследија веднаш откако Иранската револуционерна гарда објави дека започнала ракетни напади врз американски воени цели во Бахреин и Кувајт, тврдејќи дека тоа е директен одговор на ноќните воздушни удари на САД.
Американскиот претседател во своето обраќање воопшто не штедеше остри зборови и навреди на сметка на раководството во Техеран, нарекувајќи ги зли и болни луѓе. Трамп директно ги обвини иранските власти дека се валкани играчи кои први го прекршиле примирјето со неодамнешните напади врз трговските бродови во Ормускиот теснец, со што целосно го затвориле просторот за каков било дијалог. На крајот од својата изјава, тој јасно порача дека САД повеќе нема да трошат време на дипломатија, туку сакаат веднаш да ја завршат својата воена работа на теренот.
© Vecer.mk, правата за текстот се на редакцијата
