Шефот на руската информативна мрежа „Рибар“, Михаил Звинчук, кој наводно е близок до Владимир Путин, неговата сопруга Валерија, како и уште тројца нивни соработници беа уапсени во Црна Гора, пишуваат локалните медиуми.
Звинчук е означен од британската и американската влада како клучна личност за, како што велат, малигни хибридни активности и мешање во изборите, а за неговото апсење најавија и парична награда.
Црногорската полиција, во соработка со Агенцијата за национална безбедност (АНБ), во четврток наутро започна операција насочена кон апсење на лица за кои се тврди дека припаѓаат на добро познатата руска хибридна мрежа „Рибар“.
Михаил и Валерија Звинчук, за кои се вели дека се меѓу водечките луѓе на таа организација, како и уште тројца нивни соработници, беа уапсени во Рисно.
Според црногорските медиуми, полицијата спроведува акција насочена кон сузбивање на „хибридното дејство на таа мрежа“, кое британските и американските власти го поврзуваат со ширењето на пропагандата на Кремљ и операциите на таканаречено странско информатичко влијание.
Награда од 10 милиони долари
Во таа пригода, запленети се софистицирана дигитална опрема, дронови, електронски уреди и телефони.
„Важниот човек на Владимир Путин беше врзан со лисици, а станува збор за Михаил Звинчук, кој е раководител и ко-сопственик на руската информативна мрежа „Рибар“, како и неговата сопруга Валерија и тројца соработници. Тие беа врзани со лисици во четврток наутро во Бока Которска поради сомневање дека, како лица поврзани со руската информативна мрежа, учествувале во таканаречени хибридни активности на територијата на Црна Гора“, според извор близок до истрагата, пренесува Побједа.
Според медиумите, Стејт департментот, преку програмата „Награда за правда“, нуди до 10 милиони долари за информации што би овозможиле идентификација или лоцирање на странски актери „вклучени во мешање во американските избори“, вклучувајќи ги и претходно споменатите соработници на „Рибар“, или би помогнале во спречувањето на такви дејствија.
Pobjeda.me тврди, повикувајќи се на информации од безбедносниот сектор, дека Михаил Звинчук е полковник на руската воена разузнавачка служба ГРУ задолжен за хибридни операции.
Врски со Вагнер
Името на Михаил Звинчук и мрежата „Рибар“ наводно се поврзани со покојниот Евгениј Пригожин, основач и финансиер на руската паравоена и платеничка група Вагнер. Според рускиот независен медиум Медуза, Пригожин финансиски помогнал во финансирањето на проектот „Рибар“ на почетокот. Сепак, според официјалните информации, финансиската поддршка за проектот ја обезбедува руската државна корпорација „Ростек“, додека нејзините оперативци соработуваат со членови на руските разузнавачки служби.
„Рибар“ ја опишува својата функција како „воено-аналитички центар“ и управува со мрежа од поврзани канали посветени на специфични региони, вклучувајќи ги таканаречените Европар, Африкар и Балканар.
Истиот медиум (Медуза) наведува дека Чешка протерала двајца Руси кои работеле за „Рибар“ во септември. Виталиј Чашухин и Игор Долматов биле приведени откако локалниот медиум „Сезнам Зправи“ објавил дека претставници на „Рибарите“ дејствуваат во Европа.
За време на сослушувањето од страна на локалните власти, тие изјавија дека официјално работат за весникот „Известија“, кој е на листата на санкции на ЕУ од 2024 година.
Соопштение за „Рибар“
Информативната мрежа „Рибар“ вчера на својот Телеграм канал потврди дека раководителот на таа мрежа, Михаил Звинчук, и неколку руски државјани се приведени во Црна Гора.
- Во врска со најважните вести на рускиот интернет, можеме да потврдиме дека раководителот на проектот Михаил Звинчук навистина е приведен во Црна Гора заедно со други руски државјани. Сите тие престојувале во Црна Гора легално и во согласност со прописите. Меѓу другото, планирано е снимање на манастирот Цетиње, за што претходно беше поднесено целосно официјално барање - се истакнува во соопштението за медиумите на „Рибара“.
Претставниците на „Рибар“ објавија дека се во контакт со Министерството за надворешни работи на Русија, кое работи на решавање на ситуацијата и дека очекуваат ослободување на приведените бидејќи, според нивно мислење, немало прекршување на црногорските закони.
- Објавувањето на содржини на главниот канал на проектот и регионалните канали продолжува со непроменето темпо. Тука ќе објавуваме информации за понатамошниот развој на ситуацијата - пишува во објавата на оваа мрежа на каналот Телеграм.
Што е „Рибар“?
„Рибар“ е руска медиумска и информативна мрежа основана во 2018 година, која доби меѓународно признание за време на руската инвазија на Украина.
Мрежата првично беше замислена како платформа за воена анализа и известување за конфликти, но со текот на времето прерасна во широка мрежа на комуникациски канали. Проектот е основан во 2018 година, а неговиот Телеграм канал го следат повеќе од милион корисници.
Звинчук е под британски санкции, додека американскиот Стејт департмент го наведува како едно од лицата вклучени во операции со злонамерно влијание насочени кон изборниот процес во САД.
Патем, идентитетот на другите три уапсени лица сè уште не е објавен.
© Vecer.mk, правата за текстот се на редакцијата
